ریحام خان ایک بار پھر تنازع کی زد میں

19 ستمبر 2018

وزیراعظم عمران خان کی سابق اہلیہ ریحام خان اکثر اپنے بیانات کے باعث سرخیوں کا حصہ رہتی ہیں اور اب ان کے ایک ٹوئیٹ سے نیا تنازع سامنے آیا ہے۔

اس سے پہلے ان کی سوانح حیات پر پاکستان بھر میں کافی بحث ہوتی رہی اور اب ریحام خان نے آسکر ایوارڈز 2019 کی غیرملکی فلموں کے زمرے کے لیے پاکستان کی جانب سے نامزد کی جانے والی فلم 'کیک' کے انتخاب پر سوال اٹھایا ہے۔

درحقیقت انہوں نے الزام عائد کیا ہے کہ 'کیک' کا انتخاب اس وجہ سے ہوا ہے کہ اس کے پروڈیوسر زلفی بخاری وزیراعظم عمران خان کے قریبی دوست ہیں۔

مزید پڑھیں : ریحام خان کی متنازع کتاب میں کیے جانے والے 12 'انکشافات'

ٹوئٹر پر اپنے ایک پیغام میں ریحام خان نے لکھا 'کون کہتا ہے کہ آپ اپنا کیک حاصل نہیں کرسکتے اور اسے کھا نہیں سکتے؟ زلفی بخاری وزیراعظم کے دوست ہیں اور اب ان کی فلم آسکر کے لیے پاکستان کی انٹری کے طور پر جارہی ہے'۔

ریحام خان کی اس ٹوئیٹ پر فلم کی ٹیم کا کافی سخت ردعمل سامنے آیا۔

فلم کے ڈائریکٹر عاصم عباسی نے اپنی ایک ٹوئیٹ میں لکھا 'میں سمجھ سکتا ہوں کہ ہماری کہانی میں نوٹنکی اور مصالحے کی کمی تھی، مگر پھر بھی یہ کافی عجیب بات ہے کہ ہماری محنت اور کمیٹی کے فیصلے پر اعتراض کیا جائے'۔

اسی طرح فلم میں کام کرنے والے اداکار عدنان ملک نے بھی ٹوئٹر پر ریحام خان کے بیان پر ردعمل ظاہر کرتے ہوئے لکھا ' یہ حیران کن اور غیرمنصفانہ دعویٰ ہے، جس میں آسکر کمیٹی کے قابل احترام کی خودمختاری سے مکمل عدم اتفاق سیاسی نظریے کی بنیاد پر کیا گیا، یہ وہ فلم ہے جسے ناقدین نے بھی سراہا تھا (بشمول برطانوی اخبار گارڈین نے 4 اسٹارز دیئے)۔

ٹوئٹر صارفین کی جانب سے بھی ریحام خان کے بیان پر فلم کا دفاع کیا گیا۔

خیال رہے کہ آسکر ایوارڈ یافتہ فلم ساز شرمین عبید چنائے کی سربراہی میں قائم پاکستانی کمیٹی نے ‘کیک’ کو آسکر کے لیے منتخب کیا، جس کا نام جلد ہی ایوارڈ دینے والی کمیٹی کو بھجوایا جائے گا۔

یہ بھی پڑھیں : ‘کیک’ آسکر ایوارڈ کے لیے منتخب

آسکر کے لیے پاکستان میں کام کرنے والی اکیڈمی کے دیگر ارکان میں ناول نگار کاملہ شمسی، اداکارہ اور ڈائریکٹر سائرہ کاظمی، ناول نگار ایچ ایم نقوی، گلوکارہ حدیقہ کیانی، زوئی وکاس جی، گلوکار علی سیٹھی، صحافی ندیم فاروق پراچہ، انٹرپرینر نبیلہ مقصود، اداکار خالد ملک اور فیصل قریشی شامل ہیں۔

فلم کی کہانی ایک خاندان کے گرد گھومتی ہے، جو کئی چھوٹے چھوٹے تنازعات میں گھرا نظر آتا ہے، تاہم فلم میں شامل جذباتی، کامیڈی اور رومانوی مناظر کی وجہ سے اس فلم کو دیگر فلموں سے منفرد بھی کہا گیا۔

ضرور پڑھیں

تبصرے (2) بند ہیں

Citizen Sep 20, 2018 02:08pm
This time Reham is absolutely right.
Babu Sep 20, 2018 05:33pm
Reham you are always right even with not so popular comments. Beautiful lady with brains.