پاکستان الیکٹرونک میڈیا ریگولیٹری اتھارٹی (پیمرا) نے نجی ٹی وی چینلزپر نشر ہونے والے بچوں کے پروگرامز اور کارٹون میں غیرمناسب مواد نشر ہونے پر ٹی وی چینلز کو ہدایات جاری کردیں۔

پیمرا نے اپنے اعلامیے میں خبردار کیا ہے کہ بچوں کے تفریحی چینلزپر نشر ہونے والے کارٹون سے متعلق مستقل شکایات موصول ہو رہی ہیں، اس لیے تمام چینلز اپنے پروگرام پیمرا قوانین اور الیکٹرونک میڈیا ضابطہ اخلاق 2015 کے مطابق ترتیب دیں۔

مزید پڑھیں : پیمرا نے 'دیامربھاشاڈیم فنڈ' پر توہین آمیز تبصروں کا نوٹس لے لیا

پیمرا نے اپنے بیان میں واضح کیا کہ والدین اور ماہرینِ نفسیات کی جانب سے تشویش کا اظہار کیا گیا ہے کہ کارٹون چینلز پر دکھایا جانے والا مواد بچوں میں عدم برداشت اور غیر سماجی رویوں کو فروغ دے رہا ہے۔

بیان میں مزید کہا گیا کہ کارٹون کرداروں میں ناشائستہ زبان استعمال ہونے کی وجہ سے بچوں کی تربیت پر بُرا اثر پڑ رہا ہے ، علاوہ ازیں تشدد اور عدم برداشت پر مبنی مواد بچوں کی ذہنی اور جسمانی نشوونما کے لیے مناسب نہیں۔

پیمرا نے بچوں کے پروگرامز اور کارٹون سے متعلق تمام لینڈنگ رائٹس پرمیشن ہولڈرز کو تنبیہ کی کہ بچوں کے لیے نشر کیا جانے والا مواد ایسا ہو جو ان کی تربیت اور انفرادی صحت کو بہتر کرنے میں نہ صرف مددگار ہو بلکہ بچوں میں اچھے اخلاق اور خود اعتمادی کو فروغ دے۔

پہ بھی پڑھیں : پیمرا کو ٹی وی چینلز کی ریٹنگ جاری کرنے کا اختیار دے دیا گیا

پیمرا نے ہدایت کی کہ بچوں کے لیے ایسا مواد نشر کیا جائے جو انہیں ایک بہتر انسان بنانے میں اپنا کردار ادا کرے۔

علاوہ ازیں پیمرا نے تمام نجی چینلز کو احکامات جاری کیے ہیں کہ وہ ادارہ جاتی نگران کمیٹی تشکیل دیں تا کہ پروگرام نشر ہونے سے پہلے الیکٹرونک میڈیا ضابطۂ اخلاق 2015 (بالخصوص بچوں سے متعلق شقوں) پر عمل درآمد کو یقینی بنایا جاسکے ۔