اسلام آباد میں ہاؤسنگ سوسائٹیز کی تشہیر پر پابندی

اپ ڈیٹ 14 جنوری 2019
یہ پابندیاں دفعہ 144 کے تحت 2 ماہ کے لیے لگائی گئی ہیں—فائل فوٹو
یہ پابندیاں دفعہ 144 کے تحت 2 ماہ کے لیے لگائی گئی ہیں—فائل فوٹو

اسلام آباد کیپیٹل ٹیریٹری (آئی سی ٹی) کے ضلعی مجسٹریٹ نے شہر میں مختلف پابندیاں عائد کرتے ہوئے ان کا نوٹیفکیشن جاری کردیا۔

ضلعی انتظامیہ کی جانب سے جاری نوٹیفکیشن کے مطابق شہر میں ہاؤسنگ سوسائٹی کی تشہیر، اخبارات میں اشتہارات دینے، پلاٹس فروخت کرنے، ممبرشپ فیس لینے سے متعلق تمام قسم کی تشہیر پر پابندی لگادی گئی۔

مزید پڑھیں: اسلام آباد میں 2 ماہ کیلئے ڈبل سواری پر پابندی عائد

ہاؤسنگ سوسائٹیز کی جانب سے غیر قانونی تشہیر کرکے فراڈ کے ذریعے عوام سے رقم بٹوری جاتی ہے، لہٰذا ان کی تشہیر پر پابندی لگائی جاتی ہے۔

نوٹیفیکیشن کے مطابق ضلعی انتظامیہ نے اسلام آباد میں پہاڑوں کی کھدائی سمیت فرقہ واریت میں استعمال ہونے والے سی ڈی، ڈی وی ڈی اور ساؤنڈ سسٹم پر بھی پابندی عائد کردی۔

اس کے علاوہ ضلعی انتظامیہ نے شہر میں آتش بازی، اس کا سامان رکھنے، خرید و فروخت کرنے پر بھی پابندی عائد کردی جبکہ آتش بازی کے اوزار رکھنے کی بھی ممانعت ہوگی۔

وفاقی دارالحکومت کی انتظامیہ کی جانب سے جاری نوٹیفکیشن میں شہر بھر میں فرقہ واریت پر مبنی بینرز لگانے، وال چاکنگ کرنے اور پمفلٹس بانٹنے پر بھی پابندی لگادی گئی۔

یہ بھی پڑھیں: اسلام آباد میں ایک بار پھر دفعہ 144 نافذ

ضلعی انتظامیہ کے اعلامیہ کے مطابق اسلام آباد میں لاؤڈ اسپیکر سے فرقہ واریت پر مبنی تقاریر پر بھی پابندی ہوگی جبکہ تمام قسم کے جلسے، جلوس، اجلاس، مجالس اور مذہبی اجتماعات پر بھی پابندی عائد کردی گئی ہے۔

نوٹیفکیشن کے مطابق یہ تمام پابندیاں دفعہ 144 کے تحت ڈپٹی کمشنر حمزہ شفقت نے عائد کی ہیں اور ان تمام پابندیوں کا اطلاق آج (14 جنوری) سے آئندہ 2 ماہ تک ہوگا جبکہ خلاف ورزی کرنے والوں کے خلاف سخت کارروائی کی جائے گی۔

تبصرے (0) بند ہیں