فائل فوٹو—اے پی

سری نگر: ہندوستان کے نیم فوجی اہلکاروں نے کشمیر میں بارڈر سیکورٹی فورس اسٹیشن کے باہر مظاہرہ کرنے والے چھ افراد کو فائرنگ کر کے ہلاک کر دیا۔

سرکاری حکام نے نام نہ ظاہر کرنے کی شرط پر بتایا کہ یہ واقعہ جمعرات کو سری نگر سے 230 کلومیٹر دور گُول میں پیش آیا-

ایک پولیس اہلکار کا کہنا تھا کہ فائرنگ کے بعد افراتفری کا عالم تھا، چھ افراد جان سے گئے جبکہ درجن بھر زخمی ہیں۔

ان کا کہنا تھا کہ مرنے والوں کی تعداد میں اضافے کا خدشہ ہے۔

عینی شاہدین نے اے ایف پی کو بتایا کہ بدھ کی شام ہندوستانی فوجی رمضان کے مقدس مہینے میں عبادت گزاروں کے بلند آواز میں تلاوت کرنے پر شکایت کرنے کے لیے علاقے کی مسجد میں داخل ہو گئے تھے۔

انہوں نے مزید بتایا کہ مظاہرین اس واقعہ کے خلاف احتجاج کے لئے جعمرات کی صبح سے ہی بی ایس ایف سٹیشن کے باہر جمع ہوگئے تھے۔

ایک عینی شاہد نے اپنا نام نہ ظاہر کرتے ہوئے قریبی گاؤں سے فون پر بتایا کہ بی ایس ایف کے فوجیوں نے اندھا دھند فائرنگ کی، جس سے مظاہرین کو چھپنے کی جگہ بھی نہ ملی۔