ایران کی خلیج فارس میں امریکی بیڑے کی ڈرون سے کامیاب نگرانی
ایران کے پاسداران انقلاب نے کامیاب پرواز کے ذریعے خلیج فارس میں امریکی بحری بیڑے کی ڈرون سے نگرانی کرنے کا دعویٰ کردیا۔
ایران کے نیم سرکاری خبر ایجنسی تسنیم کی رپورٹ کے مطابق نگرانی کرنے والے ایرانی ڈرون کی فوٹیج دکھائی گئی جو خلیج فارس میں امریکی بیڑے ڈوائیٹ ڈی آئیزن ہوور اور دیگر امریکی وار شپ کے اوپر سے گزر رہا تھا۔
مزید پڑھیں: ایرانی سپریم لیڈر نے پاسداران انقلاب کا نیا چیف کمانڈر مقرر کردیا
تصاویر میں بحری بیڑے پر جیٹ فائٹر طیارے بھی دیکھے جاسکتے ہیں تاہم یہ واضح نہیں کہ یہ ویڈیو کب بنائی گئی تھی۔
خیارل ہے کہ یہ ایران کی جانب سے یہ اقدام ایک ایسے وقت میں سامنے آیا جب امریکی حکومت نے رواں ماہ کے آغاز میں ایران پر دباؤ بڑھانے کے لیے پاسداران انقلاب کو دہشت گرد تنظیم قرار دے دیا تھا۔
ایران نے امریکا کے اس اقدام کے رد عمل میں خطے میں موجود تمام امریکی افواج کو دہشت گرد قرار دیا تھا۔
یہ بھی پڑھیں: امریکا نے ایرانی ’پاسداران انقلاب‘ کو دہشت گرد قرار دے دیا
امریکی نیول فورسز سینٹرل کمانڈ کی ترجمان لیفٹننٹ کلو جے مورگن کا کہنا ہے کہ امریکا اور اس کے اتحادیوں کو آبنائے ہرمز پر نظر رکھنے کی آزادی ہے۔
تاہم انہوں نے اس بات کی مزید وضاحت نہیں کی۔
امریکا نے ڈونلڈ ٹرمپ کے صدر منتخب ہونے کے بعد ایران سے دیگر عالمی طاقتوں کے ساتھ کیے گئے جوہری معاہدوں سے دستبرداری کا اعلان کیا تھا اور ایران پر دیگر پابندیاں بھی عائد کردی تھیں۔
حال ہی میں امریکا نے دوست ممالک کو بھی ایران سے تیل کی خریداری ترک کرنے کا مطالبہ کرتے ہوئے خبردار کیا تھا کہ مستقبل میں دوست ممالک باز نہیں آئے تو ان پر بھی پابندیاں عائد کی جاسکتی ہیں۔
لائیو ٹی وی