اسلام آباد کی احتساب عدالت نے جعلی بینک اکاؤنٹس کیس میں ملزم اور قومی احتساب بیورو (نیب) کے درمیان پلی بارگین کی منظوری دے دی۔

ڈان اخبار کی رپورٹ کے مطابق احتساب عدالت کے جج نے ہریش جی کی پلی بارگین کی درخواست منظور کرنے کے بعد انہیں ملزمان کی فہرست سے نکال دیا۔

نیب نے احتساب عدالت کو بتایا کہ چیئرمین نیب جسٹس ریٹائرڈ جاوید اقبال نے ہریش جی کی پلی بارگین کی درخواست منظور کر لی تھی جس میں انہوں نے پلی بارگین کے تحت 2 کروڑ 3 لاکھ روپے دینے پر رضامندی ظاہر کی تھی۔

عدالت نے ملزم سے دریافت کیا کہ کیا وہ اپنی مرضی سے یہ رقم دینا چاہتا ہے جس پر ہریش جی نے کہا کہ وہ اس پر راضی ہے۔

جج نے پوچھا کہ 'آپ کو معلوم ہے کہ پلی بارگین کے بعد آپ 10 سال تک انتخابات میں حصہ نہیں لے سکتے؟'

جس پر ملزم نے جواب دیا کہ 'وہ انتخابات میں حصہ لینے کا ارادہ نہیں رکھتا۔'

عدالت نے ملزمان کی فہرست سے ہریش جی کا نام نکالنے کی نیب کی درخواست منظور کر لی۔

نیب نے دعویٰ کیا تھا کہ ہریش اینڈ کمپنی نے سندھ اسپیشل انیشیوٹو ڈپارٹمنٹ سے پانی کی سپلائی کا ٹھیکہ حاصل کیا تھا لیکن وہ منصوبہ مکمل کرنے میں ناکام رہے اور فنڈز نوڈیرو ہاؤس کے اخراجات کے لیے استعمال ہوئے۔