عالمی شہرت یافتہ گلوکار راحت فتح علی خان اور عاطف اسلم نے سعودی عرب کے دارالحکومت ریاض میں رواں برس کے پہلے ہفتے سے شروع ہونے والے ثقافتی فیسٹیول میں اپنی آواز کا جادو جگا کر لوگوں پر سحر طاری کردیا۔

عاطف اسلم اور راحت فتح علی خان نے ریاض میں 11 اکتوبر سے شرو ع ہونے والے میلے ’ریاض سیزن‘ میں 25 اکتوبر کو اپنی آواز کا جادو جگایا۔

راحت فتح علی خان اور عاطف اسلم ’ریاض سیزن‘ میں اپنے فن کا مظاہرہ کرنے والے اب تک کے پہلے پاکستانی فن کار بن گئے۔

یہ بھی پڑھیں: راحت فتح علی خان اور عاطف اسلم رواں ماہ سعودی عرب میں پرفارم کریں گے

توقع کی جا رہی ہے کہ رواں برس دسمبر تک جاری رہنے والے ’ریاض سیزن‘ کے میلے میں مزید پاکستانی فنکار پرفارم کریں گے۔

’ریاض سیزن‘ میں 25 اکتوبر کو راحت فتح علی خان اور عاطف اسلم سمیت 4 بھارتی فنکاروں اور دیگر عرب فنکاروں نے بھی پرفارمنس کی۔

اب تک ریاض سیزن میں پاکستانی و بھارتی فنکاروں سمیت مشرق وسطیٰ اور بعض مغربی فنکار بھی پرفارم کر چکے ہیں جبکہ کئی معروف فنکار رواں برس 15 دسمبر تک اسی میلے میں پرفارم کریں گے۔

ریاض سیزن میں ہولی وڈ اداکاروں کی شرکت سمیت معروف امریکی و برطانوی گلوکاروں کی جانب سے پرفارم کیے جانے کا بھی امکان ہے اور ساتھ ہی جنوبی کوریا کے پاپ میوزیکل گروپ بھی اس کا حصہ بنیں گے۔