دوسرا ٹیسٹ: صورتحال دیکھ کر ٹیم میدان میں اتاریں گے، اظہر علی
قومی کرکٹ ٹیم کے کپتان اظہر علی نے سری لنکا کے خلاف دوسرے ٹیسٹ کے حوالے سے کہا ہے کہ نیشنل اسٹیڈیم کراچی کی صورت حال کو دیکھ کر ایسی ٹیم میدان میں اتاریں گے جو میچ جتوا سکے۔
نیشنل اسٹیڈیم کراچی میں پریکٹس کے بعد پریس کانفرنس کرتے ہوئے اظہر علی نے کہا کہ جب میں سمجھوں گا کہ میں نہیں کھیل سکتا تو خود بتا دوں گا، تاہم کوشش ہے کہ جلد سے جلد فارم بحال کرکے لمبی اننگز کھیلوں۔
ان کا کہنا تھا کہ کراچی میں ٹیسٹ میچ کھیلنے کے لیے پرجوش ہیں اور کوشش ہو گی کہ کراچی ٹیسٹ میں بڑی اننگز کھیلوں۔
اظہر علی نے کہا کہ آئی سی سی ٹیسٹ چیمپئن شپ سے ایک دلچسپی پیدا ہوئی ہے اور امید ہے کہ کراچی میں بھی شائقین کی بڑی تعداد میچ دیکھنے اسٹیڈیم آئے گی۔
مزید پڑھیں:ون ڈے اور ٹی20 سیریز کیلئے پاکستان نہ آنے کا پچھتاوا ہے، سری لنکن کپتان
قومی ٹیسٹ ٹیم کے کپتان کا کہنا تھا کہ آسٹریلیا جیسے ملک میں تجربہ کار باؤلرز نہ ہوں تو پریشانی ہوتی ہے لیکن آئی سی سی ٹیسٹ چیمپئن شپ میں ہوم کنڈیشنز کا فائدہ اٹھانے کی بھرپور کوشش کریں گے۔
ان کا کہنا تھا کہ دوسرے ٹیسٹ کے لیے بہترین حکمت عملی اپنائیں گے، کوشش ہے اچھی ٹیم گراؤنڈ میں اتاریں اور ایسی ٹیم میدان میں اتاریں گے جو میچ جتوا سکے۔
گزشتہ سیریز میں کارکردگی کے حوالے سے تنقید پر ان کا کہنا تھا کہ دورہ آسٹریلیا میں مشکل ہوتی ہے اور اس حوالے سے جو تنقید ہوئی اس کو مثبت انداز میں لیتا ہوں۔
انہوں نے کہا کہ بابر اعظم اور عابد علی کی بیٹنگ سے مثبت تاثر ملا ہے اور ہم نیشنل اسٹیڈیم میں صورت حال کو دیکھ کر ٹیم میدان میں اتاریں گے، وکٹ کو مدنظر رکھ کر ٹیم تشکیل دی ہے۔
یہ بھی پڑھیں:آئندہ سال ایم سی سی کی ٹیم پاکستان کا دورہ کرے گی
اظہر علی نے کہا کہ ٹیم میں نئے لڑکے ہیں لیکن بہتری کی جانب بڑھ رہے ہیں، شاہین شاہ آفریدی اور نسیم شاہ اچھی باؤلنگ کر رہے ہیں۔
انہوں نے کہا کہ فواد عالم نے ڈومیسٹک کرکٹ میں اچھی کارکردگی دکھائی ہے اور وہ کئی برسوں بعد قومی اسکواڈ میں شامل ہوئے ہیں اور ہمارے پلان کا حصہ ہیں، جب ضرورت ہوگی ٹیم میں شامل کیا جائے گا۔
یاد رہے کہ نیشنل اسٹیڈیم کراچی میں دس سال بعد جمعرات سے ٹیسٹ میچ کھیلا جائے گا جہاں پاکستان اور سری لنکا کی ٹیمیں مدمقابل ہوں گی۔
راولپنڈی میں کھیلے گئے سیریز کا پہلا ٹیسٹ بارش کے باعث نتیجہ خیز ثابت نہیں ہوسکا تھا تاہم پاکستان کی جانب سے عابد علی نے ڈیبیو ٹیسٹ میں سنچری بنا کر ون ڈے اور ٹیسٹ ڈیبیو میں سنچری بنانے کا عالمی ریکارڈ بنایا تھا۔
لائیو ٹی وی