ٹی سی ایل نے 2022 کے لیے اپنے فونز اور ٹیبلیٹس کو متعارف کرا دیا ہے۔

ٹی سی ایل 30، 30 فائیو جی، 30 پلس، 30 ایس ای اور 30 ای آنے والے مہینوں میں مختلف ممالک میں دستیاب ہوں گے۔

ٹی سی ایل 30 فائیو جی ان سب میں واحد فون ہے جس میں 5 جی سپورٹ موجود ہے مگر فیچرز کے لحاظ سے یہ ٹی سی ایل 30 سے کچھ زیادہ مختلف نہیں۔

ٹی سی ایل 30، 30 فائیو جی اور 30 پلس میں 6.7 انچ کا امولید ڈسپلے موجود ہے جبکہ چھوٹے ڈسپلے والا فون چاہتے ہیں تو 30 ایس ای میں 6.52 انچ کی اسکرین موجود ہے۔

5 جی ماڈل میں 13 میگا پکسل سیلفی کیمرا موجود ہے جبکہ ڈیوائس کے اندر میڈیا ٹیک کا ڈیمینسٹی 700 پراسیسر موجود ہے۔

5010 ایم اے ایچ بیٹری سے لیس اس فون کو اپریل میں 249 یورو (49 ہزار پاکستانی روپے سے زائد) میں فروخت کے لیے پیش کیا جائے گا۔

30 سیریز کے فونز میں بیک پر 3 کیمروں کا سیٹ اپ ہے جس کا مین کیمرا 50 میگا پکسل کا ہے جبکہ اس کے ساتھ الٹرا وائیڈ اور میکرو کیمرے موجود ہیں۔

ٹی سی ایل 30 میں 64 جی بی اسٹوریج ہے جبکہ 30 پلس میں 128 جی بی اسٹوریج دی گئی ہے۔

ٹی سی ایل 30 میں 8 میگا پکسل سیلفی کیمرا اور پلس ماڈل میں 13 میگا پکسل کیمرا دیا گیا ہے۔

دونوں میں میڈیا ٹیک کا ہیلیو جی 37 پراسیسر اور 5010 ایم اے ایچ بیٹریز دی گئی ہیں۔

یہ دونوں سب سے پہلے یورپ میں فروخت کے لیے پیش کیے جارہے ہیں، ٹی سی ایل 30 179 یورو (35 ہزار پاکستانی روپے سے زائد) جبکہ 30 پلس 199 یورو (39 ہزار پاکستانی روپے سے زائد) میں دستیاب ہوگا۔

ٹی سی ایل 30 ای اور 30 ایس ای اس سیریز کے سستے فونز ہیں جن میں 6.52 انچ کا کم ریزولوشن والا ڈسپلے موجود ہے۔

میڈیا ٹیک ہیلیو جی 25 پراسیسر دونوں فونز میں دیا گیا ہے جبکہ 5000 ایم اے ایچ بیٹریاں بھی ان کا حصہ ہین۔

سب فونز میں اینڈرائیڈ 12 ٓپریٹنگ سسٹم دیا گیا ہے اور 30 ایس ای ابھی یورپ میں دستیاب ہے جبکہ 30 ای اپریل میں فروخت کے لیے پیش کیا جائے گا۔

ٹی سی ایل 30 ای کی قیمت 139 یورو (27 ہزار پاکستانی روپے سے زائد) جبکہ 30 ایس ای کی 149 یورو (29 ہزار پاکستانی روپے سے زائد) رکھی گئی ہے۔