اینڈرائڈ 13 میں ایک سم پر متعدد نمبرز چلانے کا فیچر دیے جانے کا امکان

10 اپريل 2022
ایںڈرائڈ کے نئے ورژن پر کام جاری ہے—فائل فوٹو: فیس بک
ایںڈرائڈ کے نئے ورژن پر کام جاری ہے—فائل فوٹو: فیس بک

خبریں ہیں کہ گوگل موبائل فون آپریٹنگ سسٹم اینڈرائڈ کے نئے ورژن یعنی اینڈرائڈ 13 پر ایسے فیچر کو متعارف کرانے پر کام کرنے میں مصروف ہے، جس کے تحت ایک ہی سم پر متعدد نمبرز چلائے جا سکیں گے۔

جی ہاں، گوگل کے ماہرین اینڈرائڈ 13 میں نیا فیچر متعارف کروانے جارہے ہیں جس کے بعد موبائل یوزرز ایک ہی موبائل سم سے مختلف نیٹ ورکز استعمال کرسکے گیں۔

عام طور پر اینڈرائڈ صارفین دو یا دو سے زائد نیٹ ورکز استعمال کرنے کے لیے ہمیشہ ایک سے زائد سم کارڈز کے بیچ پھنسے رہتے تھے لیکن صارفین کے اس اہم مسئلے کا حل اینڈرائڈ کے نئے ورژن میں حل ہوجائے گا۔

ایک رپورٹ کے مطابق ایکس ڈی اے ڈویلیپرز کی سابق چیف ایڈیٹر مشال رحمٰن کے مطابق اس فیچر کی معلومات اینڈرائڈ اوپن سوورس پراجیکٹ ( اے او ایس پی) اور اینڈرائڈ ڈویلیپرز ویبسائیٹ سے حاصل کی گئی ہے، جس سے اب صارفین ایک ہی سم پر متعدد نمبرز کی سروس بھی چلا سکیں گے۔

نئے ورژن سے لوگوں کے لیے آسانی ہوگی—فائل فوٹو: فیس بک
نئے ورژن سے لوگوں کے لیے آسانی ہوگی—فائل فوٹو: فیس بک

مشال رحمن کے مطابق اس نئے فیچر کے متعارف ہونے سے نہ صرف صارفین کو مختلف نیٹ ورکس پر منتقل ہونے میں آسانی ملے گی بلکہ اس کے ساتھ ہارڈیئرز بنانے والی کمپنیوں کا بھی پیسہ بچے گا کیوں کہ انہیں اپنے موبائلز میں دو سم کے لیے الگ الگ جگہ بنانے کی ضرورت نہیں پڑے گی، لہذا موبائل کمپنیز اس سے بچنے والی جگہ کو استعمال کرتے ہوئے اپنی بیٹری کے سائز میں اضافہ کرسکتے ہیں۔

گوگل نے فی الحال اس نئے فیچر کو متعارف کرانے کی تاریخ کا اعلان نہیں کیا ہے لیکن کمپنی کی جانب سے دیے گئے منصوبے کے مطابق یہ فیچر اکتوبر 2022 تک صارفین کی دسترس میں آجائےگا۔

ممکنہ طور پر مذکورہ فیچر کے تحت صارفین کو ایک ہی سم پر بیک وقت دو مختلف نیٹ ورکس استعمال کرنے کی سہولت فراہم کی جائے گی، تاہم اس سےزیادہ نیٹ ورکس کی سہولت بھی دی جا سکتی ہے۔

اس وقت پاکستان سمیت دنیا کے متعدد ممالک میں لوگ واٹس ایپ، فون کالز، گھریلو اور پیشہ ورانہ زندگی کے لیے الگ الگ نیٹ ورکس کی سروسز استعمال کرتے ہیں، جس وجہ سے انہیں یا تو دو سم چلانے والے موبائل یا پھر ایک سے زائد موبائل بھی خریدنے پڑتے ہیں۔

تبصرے (0) بند ہیں