ملک بھر میں چہلم حضرت امام حسین کے ماتمی جلوس نکالے گئے اور روایتی راستوں سے ہوتے ہوئے اپنے منزل پر پہنچ کر اختتام پذیر ہوئے، دیگر شہروں کی طرح حیدر آباد میں بھی جلوس برآمد ہوئے۔

حیدرآباد کے قدم گاہ مولا علی سے دوپہر کو جلوس برآمد ہوا اور شام کو کربلا دادن شاہ پہنچ کر اختتام پذیر ہوا، جلوس میں ہزاروں مرد، خواتین اور بچے شریک تھے، جس کے مختلف علاقوں سے شہری قدم گاہ میں جمع ہوئے تھے۔

حیدرآباد پولیس کا کہنا تھا کہ 2 ہزار اہلکاروں کو جلوس کی سیکیورٹی کے لیے تعینات کردیا گیا ہے۔

سرکاری خبرایجنسی اے پی پی کی رپورٹ کے مطابق پولیس کے ترجمان کا کہنا تھا کہ حیدر میں مرکزی جلوس سمیت 23 جلوس نکالے گئے۔

ان کا کہنا تھا کہ جلوس کے تمام راستے سیل کردیے گئے تھے اور قدم گاہ میں داخلے کے لیے واک تھر گیٹ نصب کیے گئے تھے۔

ترجمان نے بتایا کہ میٹل ڈیٹیکٹر کےذریعے جامع تلاشی لی گئی اور جلوس کی سیکیورٹی کی نگرانی حیدر آباد کے سینئر سپرنٹنڈنٹ آف پولیس امجد شیخ اور دیگر افسران نے کی۔