فیس بک کی مالک کمپنی ’میٹا‘ کی جانب سے متعارف کرائے گئے نئے مائکرو بلاگنگ پلیٹ فارم ’تھریڈز‘ میں اب تک کے سب سے بہترین فیچر ’ٹرینڈز‘ کی آزمائش شروع کردی گئی۔

ٹرینڈز کے فیچر نہ ہونے کی وجہ سے ہی تھریڈز کو بہت سارے لوگ ٹوئٹر سے کم اہمیت دے رہے تھے لیکن اب مذکورہ فیچر کی بھی آزمائش شروع کردی گئی۔

کمپنی کے مالک مارک زکربرگ نے اپنی تھریڈ پوسٹ میں ٹرینڈنگ ٹاپ کا اسکرین شاٹ شیئر کرتے ہوئے تصدیق کی کہ نئے فیچر کی آزمائش شروع کردی گئی۔

انہوں نے بتایا کہ ٹرینڈنگ ٹاپکس کے فیچر کی شروعات آسٹریلیا سے کی گئی ہے، جہاں صارفین کو مذکورہ فیچر تک رسائی دے دی گئی۔

ان کی جانب سے شیئر کیے گئے اسکرین شاٹ میں ٹرینڈنگ ٹاپک کو بلیو رنگ میں دیکھا جا سکتا ہے۔

اسی حوالے سے ویب سائٹ ’ٹیک کرنچ‘ نے بتایا کہ مذکورہ فیچر ٹوئٹر کے ہیش ٹیگ اور ٹرینڈ کی طرح ہی کام کرے گا لیکن تھریڈز کے فیچر میں ٹرینڈنگ ٹاپک کے ساتھ ہیش ٹیگ نظر نہیں آئے گا۔

تھریڈز کے ٹرینڈنگ فیچر کو استعمال کرنے کے لیے بھی صارفین کو پہلے ہیش ٹیگ کا استعمال کرنا پڑے گا، تاہم ہیش کا آئیکون ٹرینڈنگ ٹاپک کے ساتھ نظر نہیں آئے گا جب کہ ٹوئٹر میں ہیش ٹیگ ٹاپک کے ساتھ نظر آتا ہے۔

اسی طرح تھریڈز کا ٹرینڈنگ ٹاپک سیاہ کے بجائے بلیو رنگ میں نظر آئے گا اور تھریڈ کے ٹاپک میں بھی یہ نظر آئے گا کس ٹاپک پر کتنی پوسٹس کی جا چکی ہیں۔

مذکورہ فیچر کے بعد خیال ظاہر کیا جا رہا ہے کہ تھریڈز کے استعمال اور صارفین میں اضافہ ہوگا۔

خیال رہے کہ فیس بک اور انسٹاگرام کی مالک کمپنی میٹا نے 6 جولائی 2023 کو ’تھریڈز‘ لانچ کیا تھا۔

ٹوئٹر کی طرح متعدد فیچرز رکھنے والے والے اس پلیٹ فارم میں لانچ ہونے کے بعد سے کروڑوں صارفین نے سائن اَپ کیا تھا، تاہم تھریڈز پر کچھ محدود فیچرز کی وجہ سے صارفین نے ناگواری کا اظہار کیا تھا۔

چند دن قبل ہی تھریڈز کو انسٹاگرام اکاؤنٹ ڈیلیٹ کے بغیر ہی ڈیلیٹ کرنے کا فیچر پیش کیا گیا تھا اور اب صارفین انسٹاگرام اکاؤنٹ کے بغیر بھی اس پر لاگ ان ہو سکتے ہیں۔

ابتدائی طور پر تھریڈز کو انسٹاگرام کے ساتھ منسلک کرکے پیش کیا گیا تھا، کچھ عرصہ قبل ہی میٹا نے ’تھریڈز‘ کا ویب ورژن متعارف بھی کیا تھا۔