پاکستان شوگرملز ایسوسی ایشن کے مرکزی چیئرمین کےانتخاب پر تنازع، ڈی جی ٹی او نے وضاحت طلب کرلی
پاکستان شوگرملز ایسوسی ایشن کے مرکزی چیئرمین کےانتخاب پر تنازع پیداہوگیا، ایسوسی ایشن خیبر پختونخوا زون نےذکا اشرف کی بطورمرکزی چیئرمین انتخاب کو غیرقانونی قراردیتے ہوئے اس کی مذمت کردی، ایک روز بعد ڈائریکٹوریٹ جنرل ٹریڈ آرگنائزیشنز (ڈی جی ٹی او) نے فوری وضاحت مانگ لی۔
پاکستان شوگرملزایسوسی ایشن خیبر پختونخوا زون کے چیئرمین رضوان اللہ خان کی جانب سے جاری اعلامیہ کے مطابق اقدام خیبرپختونخوا ریجن کےجمہوری اورقانونی حق پر براہ راست حملہ ہے، اس بارمرکزی چیئرمین کی باری خیبر پختونخوا کی ہے اورچیئرمین پنجاب سے منتخب کر لیا گیا۔
اعلامیے کے مطابق وزارت تجارت کےڈی جی ٹی او کےاحکامات اورآرٹیکل آف ایسوسی ایشن کی صریحاً خلاف ورزی کی گئی، خیبرپختونخوا کو مرکزی چیئرمین کے اپنےحق سے محروم کیا گیا۔
اعلامیے میں کہا گیا ہے کہ روٹیشن پالیسی کےتحت اس بارمرکزی چیئرمین کی باری خیبر پختونخوا کی ہے۔
دریں اثنا، مرکزی چیئرمین کے انتخاب کے ایک روز بعد ڈائریکٹوریٹ جنرل ٹریڈ آرگنائزیشنز حرکت میں آگیا اور پاکستان شوگر ملز ایسوسی ایشن سےفوری وضاحت مانگ لی۔
ڈائریکٹوریٹ جنرل ٹریڈآرگنائزیشنز نے سیکریٹری جنرل پاکستان شوگرملز ایسوسی ایشن کوخط لکھ دیا، جس میں پی ایس ایم اے کے 26-2024 کےانتخابی شیڈول سے متعلق فوری وضاحت دینےکی ہدایت کی گئی ہے۔
خط میں کہا گیا ہے کہ فوری وضاحت دی جائے کہ کس حیثیت میں سابقہ کمیٹی نےالیکشن کاشیڈول جاری کیا،ایسوسی ایشن نے 3 فروری 2025 کےخط پر ابھی تک جواب نہیں دیا۔
خط کے مطابق پی ایس ایم اے کی ایگزیکٹو کمیٹی 24-2022 کے لیے تعینات کی گئی تھی، ایگزیکٹو کمیٹی کی مدت30 ستمبر2024 کو پہلےہی ختم ہوگئی تھی۔
واضح رہے کہ ذکا اشرف کے بطور مرکزی چیئرمین پاکستان شوگر ملز ایسوسی ایشن منتخب ہونےکا اعلان گزشتہ روزکیا گیا تھا۔
لائیو ٹی وی