وزیراعظم نے نیشنل فیوژن اینڈ تھریٹ اسیسمنٹ سینٹر کا باقاعدہ افتتاح کردیا
وزیراعظم شہباز شریف نے نئے قائم کیے گئے نیشنل انٹیلی جنس فیوژن اینڈ تھریٹ اسسمنٹ سینٹر کا دورہ اور باضابطہ افتتاح کیا۔
ایسوسی ایٹڈ پریس آف پاکستان (اے پی پی) کے مطابق وزیر اعظم شہباز شریف نے نئے قائم کئے گئے نیشنل انٹیلی جنس فیوژن اینڈ تھریٹ اسسمنٹ سینٹر (این آئی ایف ٹی اے سی) کا دورہ کیا۔
اس موقع پر، نائب وزیر اعظم و وزیر خارجہ سینیٹر اسحٰق ڈار، وزیر دفاع خواجہ محمد آصف اور مسلح افواج کے سربراہان بھی ان کے ہمراہ تھے۔
وزیر اعظم نے جدید ترین این آئی ایف ٹی اے سی ہیڈ کوارٹر کا باضابطہ افتتاح بھی کیا، جو پاکستان کی انسداد دہشت گردی کی قومی حکمت عملی کو مربوط بنانے کے لیے محور کا کردار ادا کرے گا۔
اس موقع پر، شہباز شریف نے اس اہم صلاحیت کو عملی جامہ پہنانے میں شامل تمام اسٹیک ہولڈرز کی کوششوں کو سراہا۔
انہوں نے این آئی ایف ٹی اے سی کو مشترکہ خطرے کی تشخیص اور ردعمل کے لیے ایک بہترین قومی پلیٹ فارم قرار دیا۔
وزیر اعظم نے اس امر پر زور دیا کہ دہشت گردی، غیر قانونی نیٹ ورکس اور بیرونی سرپرستی کے گٹھ جوڑ کو سبوتاژ کرنے کے لیے مضبوط اور موثر ادارہ جاتی میکانزم درکار ہے۔
ان کا مزید کہنا تھا کہ نیشنل انٹیلی جنس فیوژن اینڈ تھریٹ اسسمنٹ سینٹر ملک سے دہشت گردی اور اس کے معاون ڈھانچے کو جڑ سے اکھاڑ پھینکنے میں اہم کردار ادا کرے گا۔
وزیر اعظم آفس سے جاری بیان کے مطابق وفاقی ادارہ این آئی ایف ٹی اے سی 50 سے زیادہ متعلقہ وفاقی، صوبائی محکموں اور ایجنسیوں کو انٹیلی جنس اور خطرے کے انتظام کے ڈھانچہ میں یکجا کرتا ہے اور اسے مرکزی قومی ڈیٹا بیس سے بھی معاونت حاصل ہے۔
ذیلی قومی سطح پر این آئی ایف ٹی اے سی 6 صوبائی انٹیلی جنس فیوژن اینڈ تھریٹ اسسمنٹ سینٹرز (پی آئی ایف ٹی اے سیز) سے منسلک ہے جن میں آزاد جموں و کشمیر اور گلگت بلتستان کے مراکز بھی شامل ہیں جس سے وفاق سے صوبوں کے درمیان ہموار رابطہ کاری کو یقینی بنایا جا رہا ہے۔
یہ مربوط فریم ورک متعدد شعبوں میں انٹیلیجنس (معلومات) کو جمع کرنے، تجزیہ کرنے اور آپریشنل ردعمل کو ہم آہنگ کرنے کے لیے وضع کیا گیا ہے۔
بیان میں مزید کہا گیا کہ ادارہ جاتی صلاحیتوں کے مکمل اسپیکٹرم سے استفادہ کرتے ہوئے این آئی ایف ٹی اے سی قومی تیاریوں میں اضافہ، وسائل کے استعمال کو بہتر بنانے کے ساتھ ساتھ دہشت گردی کے خلاف ایک مربوط اور بروقت ردعمل کو بھی فعال انداز میں یقینی بنائے گا۔
اس سے قبل، وزیراعظم محمد شہباز شریف نے نائب وزیراعظم اور وزیر خارجہ اسحٰق ڈار، وزیر دفاع خواجہ آصف اور مسلح افواج کے سربراہان کے ہمراہ انٹر سروسز انٹیلی جنس (آئی ایس آئی) کے ہیڈ کوارٹرز کا دورہ کیا۔
وزیر اعظم اور ان کے ہمراہ موجود قیادت نے پاکستان کی خودمختاری اور علاقائی سالمیت کی کسی بھی خلاف ورزی کو روکنے اور فیصلہ کن جواب دینے کے لیے قومی نگرانی میں اضافے، بلا تعطل بین الایجنسی کوآرڈینیشن اور آپریشنل تیاریوں کو مضبوط بنانے کی ضرورت پر زور دیا۔
لائیو ٹی وی