وزیر اعظم شہباز شریف نے بلال بن ثاقب کو بلاک چین اور کرپٹو پر اپنا معاون خصوصی مقرر کر دیا، انہیں وزیر مملکت کا درجہ دیا گیا ہے۔

اس تاریخی فیصلے سے پاکستان دنیا کے ان چند (7 سے 9) ممالک کی فہرست میں شامل ہو گیا ہے جنہوں نے کرپٹو کرنسی اور بلاک چین کے لیے مخصوص اعلیٰ عہدیدار کا تقرر کیا ہے، ان میں امریکا، ایل سلواڈور اور متحدہ عرب امارات جیسے ممالک شامل ہیں۔

وزیراعظم آفس کے اعلامیے کے مطابق بلال بن ثاقب اس وقت پاکستان کرپٹو کونسل (پی سی سی) کے چیف ایگزیکٹو افسر اور وزیر خزانہ کے چیف ایڈوائزر بھی ہیں، پی سی سی کی سربراہی کرتے ہوئے انہوں نے پاکستان اور عالمی ٹیکنالوجی اداروں کے درمیان اسٹریٹجک تعاون کو فروغ دیا۔

بلال بن ثاقب کی قیادت میں کونسل نے ورلڈ لبرٹی فنانشل (ڈبلیو ایل ایف) کے ساتھ ایک تاریخی شراکت داری پر دستخط کیے، جو ایک ڈی سینٹرلائزڈ فنانس پلیٹ فارم ہے اور سابق امریکی صدر ڈونلڈ ٹرمپ کا حمایت یافتہ ہے، تاکہ پاکستان میں بلاک چین جدت اور اسٹیبل کوائن اپنانے کو فروغ دیا جا سکے۔

انہوں نے بائننس کے بانی چانگ پینگ ژاؤ (سی زیڈ) کو پاکستان کرپٹو کونسل کا اسٹریٹجک ایڈوائزر بھی مقرر کیا تاکہ ریگولیٹری ترقی، انفرااسٹرکچر کی توسیع اور تعلیم کے پروگراموں کی تشکیل میں رہنمائی کی جا سکے۔

بلال بن ثاقب نے لندن اسکول آف اکنامکس سے سوشل انوویشن اور انٹرپرینیورشپ میں ماسٹرز کیا ہے، انہیں فوربز ایشیا 30 انڈر 30 میں سوشل امپیکٹ کے لیے شامل کیا جا چکا ہے اور برطانیہ کے بادشاہ چارلس سوم کی جانب سے ممبر آف دی آرڈر آف دی برٹشن ایمپائر (ایم بی ای) سے بھی نوازا گیا ہے۔

معاون خصوصی کی ذمہ داریاں

وزیراعظم کے معاون خصوصی کے طور پر بلال بن ثاقب کی ذمہ داریوں میں ڈیجیٹل اثاثوں کے لیے ایف اے ٹی ایف کے مطابق جامع ریگولیٹری فریم ورک کی تیاری، بٹ کوائن مائننگ منصوبوں کا آغاز، بلاک چین کو حکومت، مالیات اور زمین کے ریکارڈ میں ضم کرنا، ورچوئل ایسٹ سروس فراہم کنندگان (وی اے ایس پیز) کو لائسنس کا اجرا اور ان پر نگرانی جبکہ سرمایہ کاروں کے تحفظ اور ویب تھری ایکو سسٹم کی ترقی کے لیے اقدامات کرنا شامل ہے۔

یہ تقرری اس بات کا ثبوت ہے کہ پاکستان دنیا کے ساتھ ہم آہنگ ہو کر ڈیجیٹل پالیسی اور نئی ٹیکنالوجیز کی طرف سنجیدگی سے بڑھ رہا ہے، جس طرح امریکا میں ڈیوڈ سیکس کو (ٹرمپ کی جانب سے) وائٹ ہاؤس کا اے آئی اور کرپٹو سربراہ مقرر کیا گیا، پاکستان بھی نوجوان قیادت کو اختیارات دے کر مستقبل کی سمت قدم بڑھا رہا ہے۔

چین اینالیسز گلوبل کرپٹو ایڈاپٹیشن انڈیکس 2023 کے مطابق پاکستان کرپٹو اپنانے میں دنیا کے ٹاپ 10 ممالک میں شامل ہے، جہاں تقریباً 4 کروڑ کرپٹو صارفین ہیں اور کرپٹو کے ذریعے ٹریڈنگ کا حجم 300 ارب ڈالر سے زائد ہے جبکہ سالانہ 40 ہزار سے زائد آئی ٹی گریجویٹس کے ساتھ پاکستان دنیا کی چوتھی سب سے بڑی فری لانسر مارکیٹ ہے۔

پاکستان کی 60 فیصد آبادی 30 سال سے کم عمر ہے، جو اسے کرپٹو اور بلاک چین ترقیات سے فائدہ اٹھانے کے لیے مثالی بناتی ہے۔

بلال بن ثاقب کے مطابق پاکستان کا منفرد آبادیاتی اور ڈیجیٹل منظرنامہ ہمیں ایک تاریخی موقع فراہم کرتا ہے کہ ہم ٹیکنالوجی کے مستقبل میں قائدانہ کردار ادا کریں، جہاں بلاک چین اور کرپٹو معیشت، جدت اور عالمی مسابقت کو نئی بلندیوں تک لے جائیں گے۔