عمران خان سے ملاقات پر ٹیکس لگادیں، پورا پاکستان آئے گا، بجٹ خسارہ پورا ہو جائیگا، اقبال آفریدی
قومی اسمبلی کے بجٹ اجلاس میں رکن قومی اسمبلی (ایم این اے) اقبال آفریدی نے دلچسپ تجویز دی کہ پانی پاکستان تحریک انصاف (پی ٹی آئی) عمران خان سے ملاقات پر ٹیکس لگادیں، پورا پاکستان آئے گا اور سارا بجٹ خسارہ پورا ہو جائے گا۔
ڈان نیوز کے مطابق اسپیکر قومی اسمبلی ایاز صادق نے کہا کہ میں سمجھ رہا تھا آپ اپنی جیب سے ساری رقم خرچ کریں گے، اس پر اقبال آفریدی نے کہا کہ فاٹا کو ٹیکس میں رعایت دیں اس پر ٹیکسز نہ لگائیں، آئندہ مالی سال کے بجٹ نے عوام کی مشکلات میں اضافہ کر دیا ہے۔
قبل ازیں فنانس بل 26-2025 کی شق وار منظوری کے دوران بیرسٹر گوہر اور عالیہ کامران کی ترامیم مسترد کردی گئیں، پی ٹی آئی کے ارکان اسمبلی نے وزیر خزانہ کی جانب سے تحاریک پیش کرنے کے دوران شور شرابہ بھی کیا۔
قومی اسمبلی میں وفاقی بجٹ برائے مالی سال 26-2025 کی شق وار منظوری کا عمل جاری رہا، وفاقی وزیر خزانہ محمد اورنگزیب قومی اسمبلی میں بجٹ کی شق وار منظوری حاصل کرلی۔
ڈان نیوز کے مطابق اسپیکر ایاز صادق کی زیر صدارت قومی اسمبلی کے اجلاس میں وزیراعظم شہباز شریف اور بلاول بھٹو بھی شریک ہیں۔
قومی اسمبلی کے اجلاس میں کاربن لیوی سے متعلق اپوزیشن کی تمام ترامیم مسترد کردی گئیں، وزیر خزانہ کی ترامیم منظور کر لی گئیں۔
قومی اسمبلی میں بجٹ کی شق وار منظوری سے قبل قومی اسمبلی، سینیٹ میں بجٹ پر ارکان نے کئی دن تک تفصیلی بحث کی تھی، جس کے بعد وفاقی کابینہ نے فنانس بل کی منظوری دی۔
لائیو ٹی وی