معروف بینکر جاوید قریشی پاکستان بزنس کونسل کے نئے چیف ایگزیکٹو آفیسر مقرر
پاکستان بزنس کونسل کے بورڈ آف ڈائریکٹرز نے معروف بینکر جاوید قریشی کو ادارے کا نیا چیف ایگزیکٹو آفیسر مقرر کر دیا ہے۔
ڈان نیوز کے مطابق معروف بینکر جاوید قریشی 11 جولائی 2025 سے اپنی نئی ذمہ داریاں سنبھالیں گے جب کہ سبکدوش ہونے والے سی ای او احسان ملک کو ان کی دہائی پر محیط خدمات پر خراجِ تحسین پیش کیا گیا۔
پاکستان بزنس کونسل نے تجربہ کار بینکر جاوید قریشی کو ادارے کا نیا چیف ایگزیکٹو آفیسر مقرر کر دیا ہے، اس کا باضابطہ اعلان بورڈ آف ڈائریکٹرز کی متفقہ منظوری کے ساتھ کیا گیا۔
جاوید قریشی کو بین الاقوامی بینکاری اور قیادت کا 34 سالہ تجربہ حاصل ہے، جنہوں نے مشرق وسطیٰ، افریقہ، یورپ اور پاکستان میں اعلیٰ عہدوں پر خدمات انجام دیں، وہ ابھرتی ہوئی معیشتوں، پالیسی ایڈووکیسی، اور اسٹیک ہولڈرز سے روابط کے ماہر ہیں۔
چیئرپرسن پی بی سی ڈاکٹر زیلف منیر نے سبکدوش ہونے والے سی ای او احسان ملک کی 10 سالہ قیادت کو سراہتے ہوئے کہا کہ انہوں نے پی بی سی کو ایک مؤثر اور ترقی پسند کاروباری آواز بنایا۔
انہوں نے جاوید قریشی کا خیرمقدم کرتے ہوئے کہا کہ ان کا عالمی تجربہ اور پاکستان کے کاروباری منظرنامے کی گہری سمجھ کونسل کو پائیدار ترقی اور مثبت اثرات کے اگلے مرحلے کی جانب مؤثر طور پر رہنمائی فراہم کرے گی۔
لائیو ٹی وی