ایلون مسک شاید تاریخ میں سب سے زیادہ سبسڈی حاصل کرنے والا انسان ہے، ٹرمپ
امریکی صدر ڈونلڈ ٹرمپ نے کہا ہے کہ ایلون مسک کو میری صدارتی مہم کی حمایت کرنے سے بہت پہلے یہ معلوم تھا کہ میں الیکٹرک گاڑیوں کے لازمی قانون (ای وی مینڈیٹ) کے سخت خلاف ہوں، یہ قانون مضحکہ خیز ہے، اور ہمیشہ سے میری انتخابی مہم کا اہم حصہ رہا ہے۔
اپنے ٹروتھ سوشل میڈیا پر ایک پیغام میں ڈونلڈ ٹرمپ نے کہا کہ الیکٹرک گاڑیاں ٹھیک ہیں، لیکن ہر کسی کو مجبور نہیں کیا جانا چاہیے کہ وہ ایک ایسی گاڑی خریدے۔
انہوں نے کہا کہ ایلون مسک شاید تاریخ میں سب سے زیادہ سبسڈی حاصل کرنے والا انسان ہے، اور اگر یہ سبسڈیز نہ ہوں، تو اُسے شاید اپنا کاروبار بند کرنا پڑے اور واپس جنوبی افریقہ جانا پڑے۔
انہوں نے کہا کہ سبسڈیز نہ دی جائیں تو کوئی راکٹ لانچ ہو گا، سیٹلائٹ نہ ہی الیکٹرک گاڑیاں بنیں گی، اور ہمارا ملک اربوں ڈالر بچا سکتا ہے، شاید ہمیں محکمہ حکومتی کارکردگی (DOGE) کو کہنا چاہیے کہ اس معاملے کا اچھی طرح جائزہ لے؟ بڑی رقم بچائی جا سکتی ہے!!!
قبل ازیں ایک اور پوسٹ میں امریکی صدر نے لکھا کہ ریپبلکنز، وہ ایک عظیم، خوبصورت بل (شاید اپنی نوعیت کا سب سے بڑا اور اہم) سب سے زیادہ ٹیکس کٹوتیاں اور بارڈر سیکیورٹی فراہم کرتا ہے،
ٹرمپ نے کہا کہ اس بل میں لاکھوں نوکریاں، فوج اور سابق فوجیوں کے لیے اضافہ، اور بہت کچھ ہے، اس بل کو پاس نہ کرنے کا مطلب ہے 68 فیصد کی زبردست ٹیکس بڑھوتری، جو کہ تاریخ کا سب سے بڑا اضافہ ہوگا!!!۔
یاد رہے کہ امریکی صدر کے سابق دوست اور حکومت میں اہم کردار نبھانے والے ایلون مسک نے قرض کی حد بڑھانے کے حوالے سے قانون پر تنقید کرتے ہوئے کہا تھا کہ اگر یہ بل منظور ہوا تو میں اگلے ہی دن نئی سیاسی جماعت ’امریکا پارٹی‘ تشکیل دوں گا، انہوں نے ریپبلکن پارٹی کو بھی ’پورکی پگ پارٹی‘ قرار دیا تھا۔
لائیو ٹی وی