زرعی ترقیاتی بینک کی نجکاری کیلئے مالیاتی مشیروں کی منظوری دے دی گئی
نجکاری کمیشن بورڈ نے زرعی ترقیاتی بینک کی نجکاری کے لیے مالیاتی مشیروں کی منظوری دے دی۔
جاری اعلامیے میں بتایا گیا ہے کہ نجکاری کمیشن بورڈ نے آج اپنے 236ویں اجلاس میں مشیر برائے نجکاری اور چیئرمین نجکاری کمیشن محمد علی کی صدارت میں زرعی ترقیاتی بینک لمیٹڈ کی نجکاری کے لیے مالیاتی مشیر کی تقرری کی منظوری دی۔
اعلامیے کے مطابق مسابقتی اور شفاف انتخاب کے عمل کے بعد، بورڈ نے زیڈ ٹی بی ایل ٹرانزیکشن کے لیے نیکسٹ کیپٹل لمیٹڈ کی قیادت میں مالیاتی مشیروں کے کنسورشیم کی تقرری کی منظوری دی۔
کنسورشیم کے دیگر اراکین میں اجاز احمد اینڈ ایسوسی ایٹس (قانونی)، بیکر ٹلی محمود ادريس قمر (اکاؤنٹنگ اینڈ ٹیکس)، ایکزیگٹیوز نیٹ ورک انٹرنیشنل (ایچ آر)، برج پبلک ریلیشنز (میڈیا)، سیولز پاکستان پرائیویٹ لمیٹڈ (پراپرٹی ویلیوایشن) اور پرایما گلوبل کنسلٹنگ پرائیویٹ لمیٹڈ (ایکچوئری) شامل ہیں۔
یہ کنسورشیم 6 بولی دہندگان میں سے سب سے زیادہ تکنیکی اور مالی درجہ بندی حاصل کرنے میں کامیاب رہا، جن میں عارف حبیب لمیٹڈ، اے ایف فرگوسن، اے کے ڈی سیکیورٹیز لمیٹڈ، برج فیکٹر، اور جے ایس بینک کی قیادت میں معروف کنسورشیمز شامل تھے۔
بورڈ نے منتخب کنسورشیم کے ساتھ فنانشل ایڈوائزری سروسز معاہدے کو حتمی شکل دینے کے لیے مذاکراتی کمیٹی کے قیام کی بھی منظوری دے دی۔
یہ پیش رفت حکومت کے جاری نجکاری پروگرام میں ایک اہم قدم ہے، نجکاری کمیشن کارکردگی کو فروغ دینے، نجی شعبے کی شرکت کو بڑھانے اور مالیاتی شعبے کی وسیع تر اصلاحات کی حمایت کے لیے اہم لین دین کو فعال طور پر آگے بڑھا رہا ہے۔
موجودہ نجکاری کی فہرست میں زیڈ ٹی بی ایل ترجیحی لین دین میں شامل ہے، اعلیٰ درجے کے مالیاتی مشیروں کے کنسورشیم کی تقرری اس عمل کو پیشہ ورانہ، شفاف اور بروقت انجام دینے کے لیے حکومت کے پختہ عزم کی عکاسی کرتی ہے۔
لائیو ٹی وی