کسی کی بھی موت تنہائی، خالی کمرے اور خاموشی میں نہ ہو، در فشاں سلیم کی دعا
اداکارہ در فشاں سلیم نے زندگی اور موت سے جڑے گہرے جذبات کا اظہار کرتے ہوئے سب کے لیے دُعا کی کہ کسی کی بھی موت تنہائی، خالی کمرے اور خاموشی میں نہ آئے۔
اداکارہ نے انسٹاگرام پر لمبی پوسٹ میں لکھا کہ زندگی کی اصل خوبصورتی بڑے خوابوں یا شاندار کامیابیوں میں نہیں بلکہ اُن چھوٹے، سادہ لمحات میں چھپی ہوتی ہے جنہیں ہم اکثر نظر انداز کر دیتے ہیں۔
اداکارہ نے خوشی کے درمیان آنے والے آنسوں، خاموشی میں چھپی محبت، یا کسی اپنے قریبی شخص کے ساتھ گزارے گئے لمحوں کو زندگی کی اصل خوبصورتی اور خوشیاں قرار دیا۔
اداکارہ نے لکھا کہ اکثر لوگ تنہائی میں صحیح وقت یا کسی بڑی کامیابی کے انتظار میں تنہا سانس لے کر زندگی گزار دیتے ہیں مگر زندگی کسی وقت کی پابند ہے، نہ کسی بڑے موقع کی، وہ لمحہ جو ابھی ہے، وہی زندگی ہے۔
درفشاں سلیم نے لکھا کہ موت جو شاید زندگی کا سب سے خاموش اور ناگہانی پہلو ہے، کسی اعلان کے بغیر آتی ہے۔ چاہے انسان نیند میں ہو، کھانے کی میز پر، کسی اپنے کو گلے لگاتے ہوئے، یا ایک عام دن میں جب آپ کوئی کھیل کھیل رہے ہوں، موت کسی وقت بھی آ سکتی ہے۔
اداکارہ نے لکھا کہ اسی لیے دعائیں کی جاتی ہیں کہ جب موت کا لمحہ آئے، تب جانے والا شخص تنہائی میں نہ ہو۔ اس کے گرد محبت کی فضا ہو، جانے پہچانے چہرے ہوں، وہ لوگ ہوں جو ان کے دل کو جانتے ہوں، اور وہ رشتے جو زندگی کو گھر بناتے ہیں۔
اداکارہ نے مزید لکھا کہ زندگی اور موت کے درمیان، ایک اور اہم پہلو ذہنی سکون اور احساس کی نشاندہی کی گئی ہے، آج کے تیز رفتار، شور و غل سے بھرپور دور میں، یہ ضروری ہے کہ انسان خود کو تھوڑا تھامے، دوسروں کے درد کو محسوس کرے، اور نرمی کو اپنائے۔
اداکارہ نے اپنی پوسٹ میں حال ہی میں مردہ حالت میں پائی گئی حمیرا اصغر یا عائشہ خان کا ذکر نہیں کیا، تاہم انہوں نے سب کے لیے دعا کی کہ کسی کی بھی موت تنہائی، خالی کمرے یا خاموشی میں نہ آئے۔
مداحوں کی بڑی تعداد نے سوشل میڈیا پر دُرفشاں کے جذباتی بیان کو سراہا اور اسے ایک سچائی پر مبنی اور روح کو چھو لینے والا پیغام قرار دیا۔
لائیو ٹی وی