گلگت بلتستان: سیلاب میں نجی چینل کی اینکر شوہر اور 3 بچوں سمیت بہہ گئیں
ترجمان حکومت گلگت بلتستان نے نجی ٹیلی ویژن چینل کی اینکر کی فیملی سمیت 15 سیاحوں کے سیلاب میں بہہ جانے کی تصدیق کردی۔
ترجمان گلگت بلتستان حکومت فیض اللہ فراق نے کہا کہ نجی ٹیلی ویژن ’خیبر نیوز‘ کی اینکر پرسن شبانہ لیاقت اور ان کے خاندان کے 5 افراد کے شاہراہ بابوسر پر لاپتا ہونے کے بارے میں ان کے لواحقین نے تلاش کے لیے صوبائی حکومت سے رابطہ کر لیا ہے۔
ان کا کہنا تھا کہ شبانہ لیاقت، ان کے شوہر لیاقت اور تین بچوں کے لاپتا ہونے کے بارے میں لیاقت کے خاندان کی طرف سے شکایت سامنے آئی ہے۔
فیض اللہ فراق کے مطابق عینی شاہدین نے 10 سے 15 سیاحوں کے شاہراہ بابوسر میں آبی ریلوں میں بہنے کی اطلاع دی ہے جس کے بعد کارروائی کرتے ہوئے اب تک 7 لاشیں نکالی جا چکی ہیں اور دیگر لاپتا سیاحوں کی تلاش جاری ہے۔
ترجمان نے کہا کہ سیلابی ملبے میں سرچ آپریشن میں سراغ رساں کتوں اور ڈرونز کی مدد بھی حاصل کی جارہی ہے۔
انہوں نے کہا کہ بحالی اور سرچ آپریشن میں دیامر پولیس، انتظامیہ، ڈیزاسٹر مینجمنٹ، ریسکیو 1122، افواج پاکستان اور جی بی اسکاؤٹس بھی شامل ہیں۔
لائیو ٹی وی