پاکستان تحریک انصاف (پی ٹی آئی) کے رہنماؤں نے نااہلی کے خلاف اور عبوری ضمانت کے لیے پشاور ہائی کورٹ سے رجوع کرلیا، اپوزیشن لیڈر عمرایوب اور شبلی فرازسمیت زرتاج گل نے پشاور ہائی کورٹ میں درخواستیں جمع کرا دی ہیں۔

ڈان نیوز کے مطابق اپوزیشن لیڈر عمر ایوب نے نااہلی کے خلاف پشاور ہائی کورٹ میں درخواست دائر کردی، جس میں انہوں نے الیکشن کمیشن آف پاکستان (ای سی پی) کے فیصلے کو چیلنج کیا ہے۔

درخواست میں کہا گیا ہے کہ الیکشن کمیشن نے عمر ایوب کو بطور رکن قومی اسمبلی سے ڈی نوٹیفائی کردیا، الیکشن کمیشن کا فیصلہ کالعدم قرار دیا جائے، الیکشن کمیشن نے درخواست گزار کو سنے بغیر فیصلہ جاری کیا، یہ فیصلہ غیرآئینی اور غیرقانونی ہے۔

درخواست آج ہی سماعت کے لیے مقرر کرنے کی استدعا کی گئی ہے۔

شبلی فراز اور زرتاج گل کی حفاظتی ضمانت کی درخواستیں

رہنما پی ٹی آئی و سینیٹ میں سابق قائد حزب اختلاف شبلی فراز نے پشاور ہائی کورٹ میں حفاظتی ضمانت کے لیے درخواست دائر کردی۔

درخواست میں مؤقف اختیار کیا گیا کہ شبلی فراز انسداد دہشت گردی کی خصوصی عدالت (اے ٹی سی) کی جانب سے سزا سنائے جانے فیصلے کے خلاف اپیل دائر کرنا چاہتے ہیں، درخواست گزار کو حفاظتی ضمانت دی جائے تاکہ وہ متعلقہ ہائی کورٹ سے رجوع کرسکے۔

پی ٹی آئی کی رہنما زرتاج گل نے بھی پشاور ہائی کورٹ میں حفاظتی ضمانت کی درخواست دائر کی ہے، زرتاج گل نے سید سکندر حیات شاہ ایڈووکیٹ کی وساطت سے درخواست دائر کی۔

وکیل کی جانب سے دائر درخواست میں مؤقف اپنایا گیا ہے کہ زرتاج گل کو فیصل آباد کی انسداد دہشت گردی عدالت نے 10 سال قید کی سزا سنائی۔

پٹیشن میں کہا گیا ہے کہ درخواست گزار کی عدم موجودگی میں عدالت نے سزا سنائی، درخواست گزار لاہور ہائی کورٹ میں اپیل دائر کرنا چاہتی ہے، درخواست گزار کو حفاظتی ضمانت دی جائے تاکہ وہ اپیل دائر کرسکے۔

یاد رہے کہ 31 جولائی کو فیصل آباد میں انسداد دہشت گردی عدالت نے 9 مئی کے 3 مقدمات کا فیصلہ سناتے ہوئے عمر ایوب، شبلی فراز اور زرتاج گل وزیر سمیت پاکستان تحریک انصاف (پی ٹی آئی) کے 196 رہنماؤں اور کارکنوں کو 10 سال تک قید کی سزائیں سنائی تھیں۔

شیخ رشید کے بھیتجے شیخ راشد شفیق سمیت 58 ملزمان کو 10، 10 سال قید کی سزا سنائی گئی تھی۔

بعد ازاں الیکشن کمیشن نے سینیٹ اور قومی اسمبلی کے 9 ارکان کو نااہل قرار دیا تھا، تمام ارکان قومی اسمبلی وسینٹ کی نشستیں خالی قرار دے دی گئی تھیں۔

الیکشن کمیشن کی جانب سے سینیٹ اور قومی اسمبلی کے اپوزیشن لیڈرز شبلی فراز، عمر ایوب ، حامد رضا، رائے حیدر، رائے حسن، رائے مرتضیٰ، زرتاج گل، انصر اقبال اور جنید افضل کو نااہل قرار دیا گیا تھا۔