پاکستان اور عراق نے زائرین کیلئے فیری سروس کے آغاز کیلئے مفاہمتی یادداشت پر دستخط کردیے
پاکستان اور عراق نے مذہبی سیاحت اور دو طرفہ تجارت کو فروغ دینے کے لیے گوادر بندرگاہ اور ام قصر بندرگاہ کے درمیان فیری سروس شروع کرنے کے لیے ایک مفاہمتی یادداشت (ایم او یو) پر دستخط کر دیے ہیں۔
ڈان اخبار کی رپورٹ کے مطابق یہ معاہدہ وفاقی وزیر برائے بحری امور محمد جنید انور چوہدری اور اسلام آباد میں عراقی سفارت خانے کے 3 رکنی وفد کے درمیان ملاقات کے دوران طے پایا، جس کی قیادت نائب سربراہ مشن عبدالقادر سلیمان الحمیری نے کی۔
اس معاہدے کو دو طرفہ تعلقات میں ایک نیا باب قرار دیتے ہوئے جنید انور چوہدری نے سمندری مسافروں اور کارگو روابط کے فروغ کی اہمیت پر زور دیا۔
انہوں نے کہا کہ فیری سروس ہمارے ثقافتی اور مذہبی روابط کو تقویت دے سکتی ہے، اور ساتھ ہی کاروباری مواقع بھی پیدا کرے گی، انہوں نے پاکستان کی بلیو اکانومی حکمت عملی کے تحت بندرگاہوں کی سرگرمیوں اور سپلائی چین کی ترقی کی اہمیت کو اجاگر کیا۔
یہ فیری سروس خاص طور پر ان پاکستانی زائرین کے لیے فائدہ مند ہوگی جو عراق میں مذہبی رسومات، خاص طور پر اربعین (امام حسینؑ کے چہلم) میں شرکت کے لیے سفر کرتے ہیں۔
حکومت کی جانب سے حال ہی میں ایران کے ذریعے زمینی سفر پر پابندی کے بعد (جو کہ پہلے ایک ٹرانزٹ روٹ تھا) یہ سمندری راستہ ایک مؤثر متبادل فراہم کرے گا۔ ہر سال تقریباً 10 لاکھ پاکستانی زائرین اربعین کے موقع پر نجف اور کربلا کی مقدس زیارتوں پر جاتے ہیں۔
وفاقی وزیر نے وفد کو آگاہ کیا کہ پاکستان، ایران اور خلیج تعاون کونسل (جی سی سی) کے ممالک کے ساتھ بھی فیری روٹس قائم کرنے پر کام کر رہا ہے۔
ملاقات کے دوران جنید انور چوہدری نے دو طرفہ تجارت کو وسعت دینے کی تجویز دی، جس میں پاکستان سے عراق کو ادویات، گوشت اور چاول کی برآمدات میں اضافہ شامل ہے، جب کہ عراق سے تیل کی درآمد بڑھانے پر زور دیا۔
انہوں نے کہا کہ پاکستان، عراق کی پوٹاشیم سلفیٹ کی طلب کو بھی پورا کر سکتا ہے، کیونکہ گوادر فری زون میں اس کی تیاری کی ایک سہولت موجود ہے۔
مالی سال 2024 کے تجارتی اعداد و شمار کے مطابق پاکستان نے عراق کو 5 کروڑ 40 لاکھ ڈالر مالیت سے زائد کی برآمدات کیں، جب کہ عراق سے 14 کروڑ 50 لاکھ ڈالر سے زائد کی پیٹرولیم مصنوعات درآمد کیں۔
وفاقی وزیر نے کہا کہ پاکستان، بین الاقوامی میری ٹائم آرگنائزیشن (آئی ایم او) کے آئندہ انتخابات میں حصہ لینے جا رہا ہے، اور اس سلسلے میں عراق کی حمایت طلب کی، اس پر عبدالقادر الحمیری نے پاکستان کی حمایت کی یقین دہانی کرائی۔
لائیو ٹی وی