پاکپتن: گھر میں گھس کر خاتون پر تشدد کرنے والا پولیس افسر گرفتار، مقدمہ درج
پنجاب کے ضلع پاکپتن میں گھر میں گھس کر خاتون پر تشدد کرنے والے پولیس افسر کو گرفتار کرکے مقدمہ درج کرلیا گیا، خاتون پر پولیس افسر کے تشدد کی ویڈیو وائرل ہوئی تھی۔
ڈان نیوز کے مطابق پاکپتن میں ایک گھر میں پولیس افسر کی خاتون کو تشدد کا نشانہ بنانے کی ویڈیو وائرل ہوئی تھی، جس کا ڈسٹرکٹ پولیس افسر (ڈی پی او) پاکپتن جاوید اقبال نے نوٹس لیا اور بعدازاں مذکورہ پولیس افسر کو گرفتار کرلیا گیا۔
وائرل ویڈیو میں دیکھا جاسکتا ہے کہ پولیس افسر، جس کی شناخت اےایس آئی اعجاز کے طور پر ہوئی، گھر میں ایک خاتون کو تھپڑ اور لاتیں مار رہا ہے، جبکہ ایک لیڈی پولیس اہلکار بھی اس کے ساتھ موجود ہے۔
ڈی پی او پاکپتن جاوید اقبال نے وائرل ویڈیو کا نوٹس لیا جس کے بعد اے ایس آئی اعجاز کو گرفتار کرکے اس کے خلاف مقدمہ درج کرلیا گیا۔
اے ایس آئی اعجاز فرید کوٹ چوکی میں تعینات ہے اور خاتون سے گھر خالی کرانے کے لیےگیا تھا۔
ڈی پی او جاوید اقبال کا کہنا تھا کہ قانون کو ہاتھ میں لینےکی اجازت نہیں دیں گے، اختیارات سے تجاوز کرنے والوں کی پولیس میں کوئی جگہ نہیں۔
لائیو ٹی وی