حکومت سندھ کا دو ہزار اے ایس آئی بھرتی کرنے کا فیصلہ
حکومت سندھ نے پولیس کی استعداد کار بڑھانے کے لیے 2 ہزار اسسٹنٹ سب انسپکٹرز (انویسٹی گیشن) بھرتی کرنے کا فیصلہ کرلیا۔
چیف سیکریٹری سندھ آصف حیدر شاہ کی زیر صدارت ایک اعلیٰ سطحی اجلاس منعقد ہوا جس میں صوبے میں امن و امان کی بہتری اور سندھ پولیس کی تفتیشی صلاحیت کو مضبوط بنانے کے اقدامات کا جائزہ لیا گیا۔
اجلاس میں انسپکٹر جنرل پولیس سندھ غلام نبی میمن، ایڈیشنل چیف سیکریٹری داخلہ محمد اقبال میمن، سیکریٹری سروسز غلام علی بروہانی، ڈی آئی جی اسٹیبلشمنٹ نعیم احمد، اسپیشل سیکریٹری سروسز سعید احمد لغاری اور دیگر اعلیٰ افسران نے شرکت کی۔
اجلاس میں فیصلہ کیا گیا کہ سندھ پولیس میں دو ہزار اے ایس آئی (انویسٹی گیشن) بھرتی کیے جائیں گے تاکہ تفتیشی نظام کو جدید خطوط پر استوار اور مزید مستحکم بنایا جا سکے۔ چیف سیکریٹری نے سیکریٹری سروسز کو ہدایت دی کہ شفاف، مؤثر اور بروقت بھرتی کے عمل کو یقینی بنانے کے لیے تمام رکاوٹیں دور کی جائیں۔
چیف سیکریٹری نے کہا کہ پولیس کے تفتیشی شعبے کو مضبوط بنانا ایک دیرینہ چیلنج رہا ہے۔ انہوں نے زور دیا کہ تفتیش پولیسنگ کا ایک اہم حصہ ہے اور اسے انصاف کی فراہمی کے لیے بھرپور سہولیات سے لیس ہونا چاہیے۔ انہوں نے مزید کہا کہ ان آسامیوں کی تخلیق سندھ حکومت کا ایک اہم قدم ہے جو اس خلا کو پُر کرے گا اور تفتیشی کارکردگی میں بہتری لائے گا۔
چیف سیکریٹری سندھ آصف حیدر شاہ نے اس بات پر بھی زور دیا کہ پولیس کی تفتیشی صلاحیت کو مضبوط بنانے سے عوام کا اعتماد بحال ہوگا، انصاف تک رسائی بہتر ہوگی اور جرائم کی روک تھام میں اہم کردار ادا کیا جا سکے گا۔
آئی جی سندھ غلام نبی میمن نے اس موقع پر کہا کہ اے ایس آئی انویسٹی گیشن کی بھرتی سے تفتیش کے معیار میں نمایاں بہتری آئے گی اور مجرمانہ عناصر کے خلاف فوری کارروائی ممکن ہوگی۔
لائیو ٹی وی