نیویارک:گھر میں آگ لگنے سے 7 بچے ہلاک
21 مارچ 2015
نیو یارک: امریکا کے شہر نیویارک کے ایک گھر میں آگ لگنے سے 7 بچے جھلس کر ہلاک جبکہ دو زخمی ہوگئے۔
خبر رساں ادارے رائٹرز کے مطابق نیویارک کے علاقے بروکلن کے ایک گھر میں ہفتے کو علی الصبح اچانک آگ بھڑک اٹھی جس نے دیکھتے ہی دیکھتے پورے گھر کو اپنی لپیٹ میں لے لیا۔
آتشزدگی کے نتیجے میں 7 بچے ہلاک ہوگئے، جن کی عمریں پانچ سے پندرہ سال کے درمیان ہیں۔
عینی شاہدین کے مطابق اچانے آگ لگ جانے کے باعث بچے گھر میں پھنس گئے جبکہ ان کی والدہ نے کھڑکی سے کود کر اپنی جان بچائی اور شور مچا کر اردگرد کے لوگوں کو اکٹھا کیا۔
نیو یارک فائر ڈپارٹمنٹ کے ترجمان مشعل پیریلا نے بتایا کہ ایک بچے سمیت دو افراد کو انتہائی تشویش ناک حالت میں ہسپتال منتقل کردیا گیا۔
آگ بجھانے کے لیے سو سے زائد ریسکیو اہلکاروں نے حصہ لیا، تاہم آگ لگنے کی وجہ تاحال معلوم نہیں کی جاسکی۔
تبصرے (2) بند ہیں