سست طرز زندگی دل کے امراض کا باعث
اگر آپ دن بھر میں زیادہ وقت بیٹھ کر گزارتے ہیں تو دل کے جان لیوا امراض کے لیے تیار رہنا چاہئے۔
یہ بات امریکا میں ہونے والی ایک طبی تحقیق میں سامنے آئی۔
ٹیکساس یونیورسٹی کی تحقیق کے مطابق دن بھر میں 10 گھنٹے تک بیٹھے رہنے امراض قلب کا خطرہ 8 فیصد تک بڑھا دیتا ہے۔
تحقیق میں بتایا گیا ہے کہ سست طرز زندگی خون کے شریانوں کے امراض کا باعث بنتا ہے کیونکہ اس کے نتیجے میں جسمانی وزن بڑھتا ہے جو مختلف بیماریوں کا باعث بنتا ہے۔
تحقیق کے مطابق جسمانی سرگرمیاں بلڈ پریشر، کولیسٹرول کی سطح کو کم جبکہ صحت مند وزن کو برقرار رکھنے میں مددگار ثابت ہوتی ہیں جس کے نتیجے میں دل کے دورے یا فالج کا خطرہ کم ہوجاتا ہے۔
محققین کا کہنا تھا کہ لوگوں کے لیے ضروری ہے کہ وہ جسمانی طور پر متحرک زندگی گزاریں۔
اس تحقیق کے دوران محققین نے 7 لاکھ سے زائد افراد پر ہونے والی سابقہ 9 تحقیقی رپورٹس کا تجزیہ کرکے بیٹھے رہنے کے وقت اور ہارٹ اٹیک سمیت فالج جیسے امراض کے درمیان تعلق کو دریافت کیا۔
ان کا کہنا تھا کہ اپنا زیادہ وقت بیٹھ کر، ٹی وی دیکھتے یا ڈرائیونگ کرتے گزارنے والے افراد میں یہ خطرہ زیادہ ہوتا ہے۔
یہ تحقیق طبی جریدے جاما کارڈیالوجی میں شائع ہوئی۔
لائیو ٹی وی