بولی وڈ فلم دنگل میں مہاویر سنگھ پھوگٹ کی بیٹی گیتا کا بچپن کاکردار ادا کرکے شہرت حاصل کرنے والی ظاہرہ وسیم نے بھارت کے زیرانتظام کشمیر کی وزیراعلیٰ محبوبہ مفتی سے ہفتہ کو ملاقات پر معذرت کی ہے۔

اس ملاقات کے بعد اداکارہ پر شدید تنقید کی جارہی تھی جس پر انہوں نے ایک ٹوئٹر پوسٹ پر معذرت کرتے ہوئے لکھا ' میں ان سب سے معذرت کرنا چاہتی ہوں جن کو میں نے نادانستہ طور پر تکلیف پہنچائی، میں ان کے جذبات سمجھتی ہوں، خصوصاً جب گزشتہ چھ ماہ سے کشمیرکے حالات کو دیکھا جائے تو'۔

انہوں نے کشمیر کے حالات کا حوالہ دیتے ہوئے کہا ' مجھے توقع ہے کہ لوگ یاد رکھیں گے کہ میں ابھی صرف سولہ سال کی ہوں اور اس کے مطابق مجھ سے سلوک کریں گے، مجھے توقع ہے کہ لوگ مجھے معاف کردیں گے کیونکہ یہ کوئی دانستہ فیصلہ نہیں تھا'۔

ظاہرہ کے اس معذرت نامے کو بھارتی میڈیا میں کافی شیئر کیا گیا جس کے بعد اسے ڈیلیٹ کردیا گیا۔

دوسری جانب عامر خان نے دنگل کی ساتھی اداکارہ کے حوالے سے مختلف سوچ کا اظہار کیا ہے۔

ایک فیس بک پوسٹ پر عامر خان نے ظاہرہ کے حق میں بات کرتے ہوئے ان پر تنقید کرنے والوں کو مشورہ دیا ' اس کا پیچھا چھوڑ دیں اور اس بات کا خیال کریں کہ وہ صرف سولہ سالہ لڑکی ہے'۔

ان کا کہنا تھا ' ظاہرہ نہ صرف بھارت بلکہ دنیا بھر کے بچوں کے لیے ایک رول ماڈل ہے، وہ میرے لیے بھی ایک رول ماڈل ہے'۔

انوپم کھیر، جاوید اختر، سونو نگم اور دیگر معروف شخصیات نے بھی ظاہرہ کی حمایت میں ٹوئیٹس کیے۔