بھارتی فوج کی ایل او سی پر فائرنگ، 4 افراد زخمی
بھارتی فوج کی جانب سے لائن آف کنٹرول (ایل او سی) پر مقامی آبادی پر بلااشتعال فائرنگ کے نتیجے میں 4 شہری زخمی ہوگئے۔
پاک فوج کے شعبہ تعلقات عامہ (آئی ایس پی آر) کے مطابق بھارتی فوج نے سیز فائر کی خلاف ورزی کرتے ہوئے نکیال سیکٹر کے گاؤں تُھروتی پر بلااشتعال فائرنگ و گولہ باری کی۔
بیان میں کہا گیا کہ بھارتی گولہ باری سے زخمی ہونے والوں میں ایک 12 سالہ لڑکا اور 2 خواتین بھی شامل ہیں۔
آئی ایس پی آر کے مطابق زخمیوں کی فرزانہ کوثر، برکت بیگم، احسن نصیر اور نصیر احمد کے نام سے شناخت ہوئی۔
پاک فوج کی جانب سے اس اشتعال انگیزی کا منہ توڑ جواب دیا گیا جس سے بھارتی بندوقیں خاموش ہوگئیں۔
یہ بھی پڑھیں: ایل او سی پر بھارتی فائرنگ سے ایک شہری زخمی
مقامی حکام نے ڈان کو بتایا کہ زخمی ہونے والے چاروں افراد کا تعلق ایک ہی خاندان سے ہے۔
سینئر سپرنٹنڈنٹ پولیس (ایس ایس پی) کوٹلی چوہدری ذوالقرنین سرفراز کا کہنا تھا کہ ’تقریباً رات آٹھ بجے ایک مارٹر گولہ ایک گھر پر آکر گرا، جس سے خاندان کے 4 افراد زخمی ہوئے۔‘
پولیس حکام کا کہنا تھا کہ زخمیوں سے دو کو نکیال کے تحصیل ہیڈکوارٹرز (ٹی ایچ کیو) ہسپتال جبکہ دو کو حالت تشویشناک ہونے پر کوٹلی کے ڈسٹرکٹ ہیڈکوارٹرز (ڈی ایچ کیو) ہسپتال منتقل کیا گیا۔
واضح رہے کہ بھارت کی جانب سے سیز فائر معاہدے کی خلاف ورزی کا واقعہ بھارتی انتظامیہ کی طرف سے 2 فوجیوں کو ہلاک کرنے کے بعد ان کی لاشوں کی بے حرمتی کے الزام کے چند روز بعد کی گئی۔
تاہم پاک فوج نے بھارت کے ان دعوؤں کو سختی سے مسترد کردیا تھا۔
بھارتی فورسز کی جانب سے 17 اپریل کو بھی لائن آف کنٹرول کے ساتھ آزاد جموں و کشمیر کے مختلف علاقوں میں بلااشتعال فائرنگ اور شیلنگ کی گئی تھی، جس کے نتیجے میں 2 خواتین زخمی ہوئی تھیں۔
لائیو ٹی وی