ماضی میں اسکینڈل کوئین کے نام سے شہرت رکھنے والی وینا ملک اور میرا کا موازنہ کیا جائے تو شاید ہی کوئی شخص ان کے حوالے سے کوئی درست فیصلہ کرسکے۔

تاہم اب وینا ملک ایسا روپ و راستہ اختیار کرنے والی ہیں، جس سے ان میں اور میرا میں فرق کرنا مشکل بن جائے گا۔

خبریں ہے کہ اداکارہ وینا ملک نجی ٹی وی چینل بول میں ایک کامیڈی شو کرنے والی ہیں، جس میں وہ اداکارہ میرا سمیت دیگر اداکاراؤں اور سیاستدانوں کی پیروڈی کرتی نظر آئیں گی۔

اداکارہ وینا ملک نے اپنے فیس بک پیج پر میرا کے روپ میں ایک کامیڈی ویڈیو کلپ جاری کی، جس میں انہوں نے بتایا کہ وہ ’میرے عزیز وطنو‘ پروگرام میں نظر آئیں گی۔

وینا ملک کی جانب سے اپنے ٹوئیٹر اور فیس بک پر جاری کی گئی ایک تصویر سے لگتا ہے کہ وہ رمضان المبارک میں بول ٹی وی میں رمضان شو بھی کرنے جا رہی ہیں۔

وینا ملک نے اپنے سوشل اکاؤنٹس پر اپنی آواز میں ایک نعت بھی جاری کی، وینا ملک 22 مئی کو اپنے ٹی وی شو کے سیٹ سے بھی فیس بک پر لائیو ہوئیں اور اپنے مداحوں کو اپنے سیٹ اور شو کے حوالے سے آگاہ کیا۔

خیال رہے کہ اس وقت وینا بول ٹی وی نیٹ ورک کے ٹی وی چینل پاک نیوز کے سیاسی کامیڈی شو’دل پہ مت لے یار‘ کا بھی حصہ ہیں، جس میں وہ مختلف سیاسی و سماجی رہنماؤں سمیت اداکاراؤں کی پیروڈی کرتی ہیں۔