نوکیا کی جانب سے مزید نئے اسمارٹ فونز متعارف کرائے جانے کی تیاری کرلی گئی ہے اور اس حوالے سے کمپنی کئی برس بعد اپنا پہلا فلیگ شپ فون سامنے لانے والی ہے۔

امریکی محکمے کے پاس نوکیا نے اپنے نئے فلیگ شپ فون نوکیا نائن کی تفصیلات جمع کرائی ہیں جس میں اس کے متعدد فیچرز پر روشنی ڈالی گئی ہے۔

مزید پڑھیں : نوکیا کا فلیگ شپ فون کیسا ہوگا؟

ان تفصیلات کے مطابق نوکیا نائن ڈوئل لینس کیمرے، یو ایس بی سی کنکشنز اور طاقتور ترین پراسیسر کے ساتھ ہے۔

امریکی محکمے ایف سی سی نے اسے سرٹیفیکیٹ بھی جاری کیا ہے جبکہ دیگر لیکس سے عندیہ ملتا ہے کہ یہ چار سے آٹھ جی بی ریم، 64 سے 128 جی بی اسٹوریج، 5.3 انچ کیو ایچ ڈی ڈسپلے اور 22 میگا پکسل ڈوئل کیمرے کے ساتھ ہوگا۔

اس سے قبل اس فون کے ڈیزائن کے خاکے منظرعام پر آئے تھے جن سے عندیہ ملتا تھا کہ یہ بیزل لیس اسکرین والا فون ہوگا جس میں ہوم بٹن کو ختم کرکے فنگر پرنٹ سنسر کو بیک پر منتقل کردیا جائے گا۔

یہ بھی پڑھیں : نوکیا کے ڈوئل کیمرہ فون کی ویڈیو سامنے آگئی

اسی طرح بارہ میگا پکسل فرنٹ کیمرہ، 3800 ایم اے ایچ بیٹری، اینڈرائیڈ نوگیٹ، واٹر ریزیزٹنٹ کے ساتھ اس کی قیمت 699 ڈالرز تک ہوسکتی ہے۔

یہ فون اگلی سہ ماہی کے دوران فروخت کے لیے پیش کیے جانے کا امکان ہے۔