سری لنکن ٹیم کے خلاف لاہور میں کھیلے جانے والے آخری ٹی20 میچ کیلئے ٹکٹوں کی آن لائن فروخت شروع کردی گئی ہے اور پی سی بی نے اس بار ٹکٹوں کی قیمتوں میں نسبتاً کمی کی ہے۔

حال ہی میں قذافی اسٹیڈیم لاہور میں ورلڈ الیون کے خلاف ہونے والی تین میچز پر مشتمل سیریز کیلئے ٹکٹوں کی مالیت 500 روپے سے 8 ہزار روپے تک رکھی گئی تھی جس پر شائقین کرکٹ نے زیادہ قیمتوں پر پی سی بی کو شدید تنقید کی۔

سابقہ تجربے کو مدنظر رکھ کر اس مرتبہ پی سی بی نے ٹکٹ کی قیمتیں نسبتاً کم رکھی ہیں اور ٹکٹ کی زیادہ سے زیادہ قیمت پانچ ہزار روپے ہے۔

پی سی بی نے ابتدائی طور پر فرسٹ کلاس اور وی آئی پی انکلوژرز کے ٹکٹوں کی فروخت شروع کی ہے اور بعد میں بقیہ انکلوژر کے ٹکٹ فروخت کیلئے پیش کیے جائیں گے۔

پی سی بی نے وسیم اکرم انکلوژر کے ٹکٹ کی قیمت پانچ ہزار روپے مقرر کی ہے البتہ جبکہ عمران خان اورفضل محمود انکلوژر کے ٹکٹس تین تین ہزارمیں فروخت ہوں گے۔

فرسٹ کلاس انکلوژر میں جاوید میانداد، رمیز راجہ و وسیم راجہ، عبدالقادر اور عبدالحفیظ انکلوژر کے ٹکٹ 1500 روپے میں دستیاب ہوں گے۔

پاکستان اور سری لنکاکےدرمیان سیریزکا آخری ٹی ٹونٹی قذافی اسٹیڈیم میں انتیس اکتوبر کو کھیلا جائے گا۔