کترینہ کیف کے بجائے شردھا کپورکی’بتی گل میٹرچالو‘

07 جنوری 2018
بتی گل میٹر چالو کو رواں برس 31 اگست کو ریلیز کیا جائے گا—فوٹو: بولی وڈ ببل
بتی گل میٹر چالو کو رواں برس 31 اگست کو ریلیز کیا جائے گا—فوٹو: بولی وڈ ببل

بولی وڈ کی آنے والی فلم ’بتی گل میٹر چالو‘ بھی شوٹنگ شروع ہونے سے پہلے ہی کئی عرصے سے خبروں میں ہے۔

بجلی کی تقسیم کار کمپنیوں کے گورکھ دھندے کے گرد گھومتی کہانی پر مبنی ’بتی گل میٹر چالو‘ کے لیے ہیرو کے لیے شاہد کپور کو تو 2017 کے وسط میں ہی فائنل کردیا گیا تھا۔

تاہم گزشتہ 6 ماہ سے فلم کی ٹیم ہیروئن ڈھونڈنے میں مصروف تھی۔

گزشتہ ماہ 28 دسمبر کو یہ خبر سامنے آئی تھی کہ ’بتی گل میٹر چالو‘ میں کام کرنے کے لیے بار بی ڈول کترینہ کیف نے رضامندی ظاہر کردی ہے، اور اب اسے پہلی بار شاہد کپور کے ساتھ فلم میں کاسٹ کیا جائے گا۔

تاہم اب یہ خبر سامنے آئی ہے کہ ’بتی گل میٹر چالو‘ میں شاہد کپور کے ساتھ کترینہ کیف نہیں بلکہ شردھا کپور رومانس کرتی نظر آئیں گی۔

اس طرح خبر سامنے آنے کے بعد شاہد کپور کی خواہش پوری نہ ہوسکی، وہ ایک بار پھر بار بی ڈول سے رومانس کرنے سے محروم رہ گئے۔

یہ بھی پڑھیں: کترینہ کیف کی ’بتی گل میٹر چالو‘

کری ارج اسٹوڈیو کی ٹیم نے ’بتی گل میٹر چالو‘ کے لیے سب سے پہلے وانی کپور کو کاسٹ کرنے کا فیصلہ کیا تھا، تاہم بعد ازاں ان کی جگہ بھومیکا پڈنیکر کو کاسٹ کرنے کا فیصلہ کیا گیا۔

تاہم بھومیکا پڈنیکر کی ہیروئن بننے کی خبریں بھی جلد ہی ماضی کا قصہ بنیں، جس کے بعد شردھا کپور کا نام سامنے آیا، لیکن پھر گزشتہ ہفتے اچانک کترینہ کیف کا نام سامنے آیا۔

لیکن اب ایک بار پھر یہ خبر سامنے آئی ہے کہ شردھاکپور کو’بتی گل میٹر چالو‘ کی ہیروئن کاسٹ کرلیا گیا۔

کری ارج فلم اسٹوڈیو نے اپنے ٹوئٹر اکاؤنٹ پر ممبئی مرر کی خبر ٹوئیٹ کی، جس میں ذرائع سے اس بات کی تصدیق کی گئی ہے کہ ’بتی گل میٹر چالو‘ میں شاہد کپور کی ہیروئن شردھا کپور ہی بنیں گی۔

فلم میں نہ صرف شردھا کپور ایکشن میں نظر آئیں گی، بلکہ یمی گوتم کو بھی فلم کے اہم کردار کے لیے کاسٹ کرلیا گیا۔

یمی گوتم نے اپنی ٹوئیٹ میں ’بتی گل میٹر چالو‘ کا حصہ ہونے پر خوشی کا اظہار کیا، جس پر شاہد کپور نے انہیں ٹوئٹر پر ہی ویلکم کیا۔

خبریں ہیں کہ ’بتی گل میٹر چالو‘ میں یمی گوتم ایک وکیل کا کردار ادا کریں گی، جو شاہد کپور کے ساتھ بجلی کی تقسیم کار کمپنیوں کے خلاف قانونی جنگ کرتی نظر آئیں گی۔

مزید پڑھیں: شاہد کپور کی فلم مشکلات کا شکار

جب کہ شردھا کپور ایک ایسی بھارتی گھریلو خاتون کے کردار میں نظر آئیں گی، جو بجلی تقسیم کار کمپنیوں کے گورکھ دھندے سے متاثر ہوتی ہیں۔

فلم کی کہانی بجلی تقسیم کار کمپنیوں کے غلیظ کاروبار اور ان کے کاروبار سے متاثر عوام کے گرد گھومتی ہے۔

فلم میں شاہد کپور ایک وکیل کے کردار میں نظر آئیں گے، جو بجلی تقسیم کار کمپنیوں کے خلاف قانونی جنگ کرتے دکھائیں گے۔

فلم کی ہدایات ’ٹوائلٹ ایک پریم کتھا‘ جیسی کامیاب فلم کے ڈائریکٹر شری نارائن دیں گے۔

فلم کو 31 اگست 2018 کو ریلیز کیے جانے کا امکان ہے۔

تبصرے (0) بند ہیں