سام سنگ نے رواں سال فروری میں گلیکسی ایس 9 کو متعارف کرایا تھا اور لگتا ہے کہ یہ کمپنی اپنے دوسرے فلیگ شپ فون نوٹ 9 کو توقع سے پہلے پیش کرسکتی ہے۔

امریکی جریدے فوربس کی ایک رپورٹ کے مطابق سام سنگ اپنی نوٹ سیریز کے نئے فلیگ شپ فون کو جلد پیش کرنے کا ارادہ رکھتی ہے۔

رپورٹ میں بتایا گیا کہ یہ فون جولائی میں متعارف کرایا جاسکتا ہے اور اس حوالے سے سام سنگ نے گلیکسی نوٹ 9 کے 2 ورژن چین کی وزارت صنعت و انفارمیشن ٹیکنالوجی میں سرٹیفائیڈ کرائے ہیں۔

مزید پڑھیں : سام سنگ گلیکسی ایس 9 پلس کی اصل لاگت کیا ہے؟

اس فون کے چند فیچرز بھی لیک ہوکر سامنے آئے ہیں۔

یہ فون کوالکوم اسنیپ ڈراگون 845 اور سام سنگ کے اپنے ایکسینوس 9810 پراسیسر سے لیس ہوگا (مختلف مارکیٹس میں مختلف پراسیسر والے فون دستیاب ہوں گے)۔

اسی طرح نیا ایس پین بھی متعارف کرایا جاسکتا ہے جس میں مائیکروفون کو نصب کیے جانے کی افواہیں گرم ہیں جسے فون کالز کے لیے استعمال کیا جاسکے گا۔

اسی طرح نوٹ 9 میں نیا انٹرفیس 'کراﺅن یو ایکس' بھی پیش کیا جاسکتا ہے اور دلچسپ بات یہ ہے کہ کمپنی نے اپنے اس فون کو جو کوڈ نیم دیا ہے وہ بھی کراﺅن ہے۔

گلیکسی نوٹ 9 میں سام سنگ کے ڈیجیٹل اسسٹنٹ بیکسبی کا بٹن موجود رہے گا تاہم اسے پہلے کے مقابلے میں اپ ڈیٹ کرکے پیش کیا جائے گا۔

یہ بھی پڑھیں : سام سنگ گلیکسی ایس 9 اور ایس 9 پلس پاکستان میں دستیاب

اور ہاں نوٹ 9 میں ڈسپلے کے اندر فنگرپرنٹ ریڈر کی موجودگی کی غیرمصدقہ اطلاعات بھی ہیں جو سام سنگ کا اس ٹیکنالوجی کے ساتھ پہلا فون ہوگا تاہم اس کا انحصار اس بات پر ہے کہ کمپنی اس ٹیکنالوجی کو ڈیوائس میں شامل کرنے میں کس حد تک کامیاب ہوتی ہے۔

اس فون میں گزشتہ سال کے ماڈل کے مقابلے میں زیادہ بڑی 3850 ایم اے ایچ بیٹری دیئے جانے کا بھی امکان ہے۔

فون میں گزشتہ سال کے ماڈل کے مقابلے میں کیمرہ بھی اپ ڈیٹ کیا جائے گا جس میں نہ صرف ایس 9 کی طرح ڈوئل آپرچر دیا جاسکتا ہے بلکہ فرنٹ کیمرے کو بھی اپ گریڈ کیا جائے گا۔