عام انتخابات میں پنجاب میں حکومت بنانے کے لیے مسلم لیگ ن اور تحریک انصاف کے درمیان سخت مقابلہ ہے اور پنجاب میں حکومت کے قیام کے لیے ایک ایک امیدوار انتہائی اہمیت کا حامل ہے۔

پنجاب اسمبلی کی نشست پر جن سینکڑوں امیدواروں نے فتح اپنے نام کی انہی میں سے ایک پاکستان کرکٹ بورڈ(پی سی بی) کے چیئرمین نجم سیٹھی کی اہلیہ جگنو محسن(سیدہ میمنات محسن) ہیں۔

نجم سیٹھی کی اہلیہ جگنو محسن اوکاڑہ میں پنجاب اسمبلی کے حلقہ پی پی-184 سے آزاد امیدوار کی حیثیت سے الیکشن میں کھڑی ہوئی تھیں اور انہیں تحریک انصاف اور پاکستان پیپلز پارٹی کے امیدواروں کے مقابلے کا سامنا تھا۔

جگنو محسن نے الیکشن میں 62ہزار 506ووٹ لے کر کامیابی حاصل کی جبکہ دوسرے نمبر پر بھی آزاد امیدوار سید رضا علی گیلانی رہے جنہوں نے 41ہزار 68ووٹ لیے۔

نجم سیٹھی اور عمران خان کے درمیان اختلافات کسی سے ڈھکے چھپے نہیں اور ایسے میں یہ بات انتہائی اہمیت کی حامل ہو گی کہ ان کی اہلیہ جگنو محسن پنجاب اسمبلی میں مسلم لیگ ن کا ساتھ دیتی ہیں یا وہ تحریک انصاف کی حمایت کا اعلان کریں گی؟۔