خوبصورت ترین مقام پر 160 روپے میں گھر خریدنا چاہیں گے؟

اپ ڈیٹ 17 جنوری 2019
یہ علاقہ دنیا بھر میں سیاحت کے لیے مشہور ہے—فوٹو: سی این این
یہ علاقہ دنیا بھر میں سیاحت کے لیے مشہور ہے—فوٹو: سی این این

اگرچہ دنیا کے کئی ممالک کو گھروں کی کمی کا سامنا ہے، تاہم یورپی ملک اٹلی ایسا ملک ہے، جو تقریبا ہر سال اپنے دیہات کو فروخت کرتا ہے۔

دنیا بھر میں سیاحت، کھانوں اور تاریخی مقامات کے حوالے سے منفرد اہمیت رکھنے والے اٹلی کے جنوب میں واقع بڑے اور خود مختار علاقوں میں شامل ہونے والے سسلی کے ایک خوبصورت گاؤں کے گھروں کو فروخت کے لیے پیش کردیا گیا۔

جہاں اٹلی میں سیاحت کے دوران چند ہفتوں تک قیام میں ہی لاکھوں روپے خرچ ہوجاتے ہیں، وہیں اٹلی کے خودمختار علاقے سسلی کے ایک چھوٹے سے قصبے کی انتطامیہ نے وہاں گھروں کو محض ایک یورو یعنی پاکستانی تقریبا 160 روپے میں فروخت کے لیے پیش کردیا۔

جی ہاں، یہ کوئی مذاق نہیں بلکہ ایک حقیقت ہے اور سسلی کی مقامی انتظامیہ کی اس پیش کش سے کچھ لوگوں نے فائدہ اٹھا بھی لیا اور کئی لوگوں نے گھروں کی خریداری کے لیے درخواستیں بھی جمع کرادیں۔

سسلی کا علاقہ تاریخی اہمیت کا حامل ہے—فوٹو: سی این این
سسلی کا علاقہ تاریخی اہمیت کا حامل ہے—فوٹو: سی این این

امریکی نشریاتی ادارے ’سی این این‘ کی رپورٹ کے مطابق سسلی کے تاریخی مقام پالیرمو سے محض 68 کلو میٹر کی دوری پر واقع گاؤں ’سمبوکا ڈی سلیسا‘ کے درجنوں گاؤں کو فروخت کے لیے پیش کردیا گیا۔

رپورٹ کے مطابق گاؤں سے مقامی افراد کے چلے جانے کے بعد انتظامیہ نے مجبور ہو کر وہاں گھروں کی فروخت کا اعلان کیا۔

یہ علاقہ جہاں رومن بادشاہت سے ہی اہمیت کا حامل رہا ہے، وہیں اب بھی اسے تاریخی حوالے سے منفرد اہمیت حاصل ہے اور اب تک اس علاقے میں درجنوں محقیق اپنی تحقیق کی وجہ سے رہائش پذیر ہیں۔

یہ علاقہ دنیا بھر میں نایاب شراب تیار کرنے کے حوالے سے بھی شہرت رکھتا ہے۔

اس علاقے کا سب سے تاریخی مقام پالمیرو ہیں، جہاں رومن بادشاہت کے دوران 5 تہذیبیں بستی تھیں۔

علاقے میں رومن بادشاہت کی عبادت گاہیں بھی موجود ہیں—فوٹو: سی این این
علاقے میں رومن بادشاہت کی عبادت گاہیں بھی موجود ہیں—فوٹو: سی این این

علاوہ ازیں سسلی کا یہ علاقہ سیاحت اور کھانوں کے حوالے سے بھی نہ صرف اٹلی بلکہ یورپ اور دنیا بھر میں سیاحوں کی توجہ کا مرکز ہے۔

رپورٹ کے مطابق جس گاؤں کے گھروں کو فروخت کے لیے پیش کیا گیا ہے، وہ تاریخی اہمیت کے گھر ہیں، وہاں موجود کئی گھر ایسے ہیں جو کئی صدیاں قبل بنائے گئے۔

سورج کی روشنی پڑتے ہی سونے کی طرح چمکتے پتھروں سے بنے یہ گھر مقامی افراد کی جانب سے شہروں میں منتقلی کے بعد خستہ حال ہوچکے ہیں اور مقامی انتطامیہ چاہتی ہیں کہ یہ تاریخی اور خوبصورت علاقہ پھر سے آباد ہو۔

خوبصورت پہاڑ اور جھیل علاقے کو پرسکون بناتے ہیں—فوٹو: سی این این
خوبصورت پہاڑ اور جھیل علاقے کو پرسکون بناتے ہیں—فوٹو: سی این این

مقامی انتطامیہ نے درجنوں گھروں کو محض ایک یورو یعنی 160 پاکستانی روپوں میں فروخت کے لیے پیش کیا ہے، تاہم انہیں خریدنے والے افراد کو 2 شرائط پوری کرنی پڑیں گی۔

تاریخی اور خوبصورت مقام پر گھروں کو خریدنے والے افراد کو ضمانت کے طور 5 ہزار یورو تقریبا 8 لاکھ پاکستانی روپے جمع کروانے پڑیں گے۔

علاوہ ازیں گھروں کو خریدنے والے افراد کو ان گھروں کی دوبارہ تزئین ا آرائش کرنی پڑے گی اور انہیں لازمی طور پر ان گھروں کی دوبارہ تعمیر پر کم سے کم 15 ہزار یورو یعنی پاکستانی 24 لاکھ روپے کے قریب رقم خرچ کرنی پڑے گی۔

مقامی لوگ شہروں میں منتقل ہوچکے—فوٹو: سی این این
مقامی لوگ شہروں میں منتقل ہوچکے—فوٹو: سی این این

تاہم خریداروں کو گھروں کی تزئین و آرائش کے لیے 3 سال کا وقت دیا جائے گا اور گھروں کی تزئین و آرائش کرانے کے بعد انہیں ضمانت کے طور پر رکھوائے گئے 5 ہزار یورو واپس کردیے جائیں گے۔

یہ پہلا موقع نہیں ہے کہ اٹلی کے کسی قصبے میں درجنوں گھروں کو فروخت کے لیے پیش کیا گیا ہو۔

اس سے قبل 2018 کے آغاز میں بھی جنوبی اٹلی کے سارڈینا میں بھی متعدد گھروں کو تقریبا اسی قیمت پر فروخت کے لیے پیش کیا گیا۔

یہی نہیں بلکہ اٹلی کے دیہی علاقوں کی انتظامیہ گھروں اور پورے کے پورے جزیروں اور گاؤں کو فروخت کرنے کے اعلانات کرتی رہتی ہے اور اسی سے ہی اٹلی کی حکومت کی کمائی ہوتی ہے۔

علاقے میں لذیذ اور روایتی کھانوں کے ریسٹورنٹ بھی موجود ہیں—فوٹو: سی این این
علاقے میں لذیذ اور روایتی کھانوں کے ریسٹورنٹ بھی موجود ہیں—فوٹو: سی این این

ضرور پڑھیں

تبصرے (0) بند ہیں