جنوبی افریقہ نے ورلڈ کپ 2019 کے لیے اپنی آفیشل کٹ کا اعلان کردیا جو پاکستان کی عمومی جرسی سے کافی حد تک مماثلت رکھتی ہے۔

ورلڈ کپ کی جرسی کا گزشتہ روز جنوبی افریقی ٹیم کے ساتھ اعلان کیا تھا جو اس مرتبہ ٹیم کی جرسی سے قدرے مختلف ہے۔

عام طور پر جنوبی افریقہ کی جرسی گہرے ہرے رنگ کی ہوتی ہے لیکن اس مرتبہ اس کی جرسی میں ہلکا ہرا رنگ واضح رہے جبکہ آستینیں گہرے ہرے رنگ کی بنائی گئی ہیں۔

مزید پڑھیں: ہاشم آملا جنوبی افریقہ کے ورلڈ کپ اسکواڈ میں جگہ بنانے میں کامیاب

جرسی کے عین وسط میں ساؤتھ افریقہ پیلے رنگ سے لکھا گیا ہے جبکہ ٹراؤزر کا رنگ گہرا ہرا ہے۔

جنوبی افریقی ٹیم کا گزشتہ روز اعلان کیا گیا تھا جس میں ہاشم آملا جگہ بنانے میں کامیاب رہے تھے جبکہ کرس مورس کو شاندار فارم کے باوجود اسکواڈ سے باہر کردیا گیا تھا۔

جنوبی افریقہ ورلڈ کپ میں اپنی مہم کا آغاز 30 مئی سے میزبان انگلینڈ کے خلاف اوول میں میچ سے کرے گا۔

ورلڈ کپ کے لیے جنوبی افریقی اسکواڈ ان کھلاڑیوں پر مشتمل ہے۔

فاف ڈیو پلیسی(کپتان)، ہاشم آملا، کوئنٹن ڈی کوک، ریسی وین در دوسن، ڈیوڈ ملر، جین پال ڈومینی، ایڈن مرکرم، ڈیوین پریٹوریس، ایندائل فلکوایو، کگیسو ربادا، ڈیل اسٹین، لنگی نگیدی، اینرچ نورٹجے، عمران طاہر اور تبریز شمسی۔