بھارت کے ایوان زیریں یعنی لوک سبھا انتخابات میں بھارتی جنتا پارٹی (بی جے پی) کی کامیابی کے بعد نریندر مودی نے دوسری مدت کے لیے 30 مئی کو وزیر اعظم کا حلف اٹھایا۔

وہ پہلی مدت کے لیے مئی 2013 میں وزیر اعظم بنے تھے اور 25 مئی 2019 کو اپنی آئینی مدت مکمل کرنے کے بعد وہ عہدے سے سبکدوش ہوگئے تھے۔

دوسری مدت کے لیے نئی دہلی میں ہونے والی تقریب کے دوران بھارتی صدر رام ناتھ کوبند نے ان سے حلف لیا۔

یہ بھی پڑھیں: کون، کب کتنی مدت تک بھارتی وزیر اعظم رہا

نریندر مودی کی حلف برادری تقریب میں جہاں بھارت سمیت دیگر ممالک کے سیاستدان شریک ہوئے، وہیں صنعت کار، اسپورٹس مین، صحافی، سماجی کارکنان اور فلمی ستارے بھی شریک ہوئے۔

فلم فیئر کی رپورٹ کے مطابق نریندر مودی کی جانب سے دوسری مدت کے لیے حلف اٹھائے جانے کی تقریب میں فلم ساز کرن جوہر، سپر اسٹار رجنی کانت، بھارت کے امیر ترین شخص مکیش امبانی اور ان کی اہلیہ، شاہد کپور، کپل شرما، سشانت سنگھ راجپوت، شاہ رخ، انیل کپور اور کنگنا رناوٹ سمیت دیگر اسٹارز نے شرکت کی۔