امریکی ٹینس اسٹار سرینا ولیمز یوں تو ٹینس کورٹ میں ہمیشہ اپنی حریف کھلاڑیوں کو مزے چکھاتی نظر آتی ہیں، تاہم اس بار انہوں نے ایک اور شعبے میں کئی خواتین کو پیچھے چھوڑ دیا۔

سرینا ولیمز نے امریکا کی سیلف میڈ ارب پتی خواتین کی فہرست میں جگہ بناتے ہوئے پہلی ارب پتی ایتھلیٹ کا اعزاز حاصل کرلیا۔

امریکی شہرہ آفاق اقتصادی جریدے ’فوربز‘ کی جانب سے امریکا کی ارب پتی سیلف میڈ خواتین کی جاری کردہ تازہ فہرست میں سرینا ولیمز بھی جگہ بنانے میں کامیاب ہوئی ہے۔

فوربز کے مطابق سرینا ولیمز امریکا کی وہ واحد ایتھلیٹ خاتون ہیں جو سیلف میڈ ارب پتی بنی ہیں۔

فوربز گذشتہ کچھ عرصے سے ’سیلف میڈ ارب پتی‘ بننے والی شخصیات کی فہرست جاری کردہ ہے۔

اس فہرست میں ان افراد کو شمار کیا جاتا ہے جو اپنی ذہانت اور اپنی محنت سے دولت کمانے میں کامیاب ہوجاتے ہیں۔

اس بار ادارے کی جانب سے جاری کی گئی فہرست میں سرینا ولیمز واحد ایتھلیٹ ہیں جو ارب پتی خواتین کی فہرست میں جگہ بنانے میں کامیاب ہوئی ہیں۔

رپورٹ کے مطابق سرینا ولیمز کی مجموعی دولت 22 کروڑ 50 لاکھ امریکی ڈالر ہے جو پاکستانی 25 ارب روپے سے زائد بنتی ہے۔

رپورٹ کے مطابق سرینا ولیمز کی دولت میں زیادہ تر کمائی ان کے کھیل، میڈیا میں اشتہارات اور مختلف کاروبار میں کی جانے والی سرمایہ کاری سے حاصل ہوئی۔

رپورٹ میں بتایا گیا ہے کہ سرینا ولیمز نے صحت، فیشن، ای کامرس اور کھانوں کی 34 کمپنیوں میں سرمایہ کاری کر رکھی ہے جب کہ وہ مزید نئی کمپنیوں میں سرمایہ کاری کرنے کا ارادہ رکھتی ہیں۔

سرینا ولیمز کا کہنا تھا کہ وہ مستقبل میں اپنا جیولری اور فیشن برانڈ بھی متعارف کرانے کا ارادہ رکھتی ہیں۔

سرینا ولیمز نے جن کمپنیوں میں زیادہ تر سرمایہ کاری کر رکھی ہیں وہ یا تو خواتین چلاتی ہیں یا پھر وہ سیاہ فام افراد کے ماتحت چلتی ہیں۔

فوربز نے کچھ دن قبل ہی ایک فہرست میں بتایا تھا کہ امریکی موسیقار، گلوکار اور ریپر جی زی دنیا کے پہلے ریپر ہیں جو ارب پتی بنے ہیں۔

رپورٹ میں بتایا گیا تھا کہ جے زی کی دولت ایک ارب ڈالر تک ہے۔