بین اسٹوکس کو انگلینڈ کا اعلیٰ ترین اعزاز 'نائٹ ہُڈ' دیا جائے گا

اپ ڈیٹ 16 جولائ 2019

ای میل

آل راؤنڈر بین اسٹوکس انگلینڈ کی وزیر اعظم تھریسامے سے ملاقات کر رہے ہیں— فوٹو: اے رائٹرز
آل راؤنڈر بین اسٹوکس انگلینڈ کی وزیر اعظم تھریسامے سے ملاقات کر رہے ہیں— فوٹو: اے رائٹرز

ورلڈ کپ فائنل میں شاندار اننگز کھیل کر انگلینڈ کو ورلڈ چیمپیئن بنوانے میں اہم کردار اد کرنے والے آل راؤنڈر بین اسٹوکس کو انگلینڈ کے اعلیٰ ترین اعزاز ترین اعزازات میں سے 'نائٹ ہڈ' سے نوازا جائے گا۔

لارڈز کے تاریخی میدان پر کھیلے گئے ورلڈ کپ فائنل میں بین اسٹوکس کی چار وکٹیں جلد گرنے کے بعد ناقابل شکست 84رنز کی اننگز کھیلنے کے ساتھ ساتھ جوز بٹلر کے ہمراہ اہم شراکت قائم کی جس کی بدولت انگلینڈ کی ٹیم کی میچ میں واپسی ہوئی۔

انگلینڈ اور نیوزی لینڈ کے درمیان یہ فائنل میچ ٹائی ہوا اور پھر سپر اوور میں بھی میچ ٹائی ہونے پر انگلینڈ کو میچ میں زیادہ باؤنڈریز مارنے کی بنیاد پر ورلڈ چیمپیئن قرار دیا گیا۔

بین اسٹوکس کو ان کی شاندار کارکردگی پر میچ کا بہترین کھلاڑی قرار دیا گیا اور اب انہیں انگلینڈ کے اہم ترین اعزازات میں سے ایک 'نائٹ ہڈ' سے نوازا جائے گا۔

تھریسامے کی جگہ انگلینڈ کے نئے وزیر اعظم بننے کی ریس میں شامل جانسن اور ہنٹ دونوں سے جب پوچھا گیا کہ کیا اسٹوکس کو 'نائٹ ہُڈ' دیا جائے گا تو انہوں نے اس کی تصدیق کی۔

یہ اعزاز کسی بھی فرد کو اس کی برطانیہ کے لیے شاندار خدمات پر بادشاہ یا ملکہ برطانیہ کی طرف سے دیا جاتا ہے اور جس شخص کو یہ اعزاز دیا جاتا ہے وہ اپنے نام کے ساتھ 'سر' لگا سکتا ہے۔

اگر بین اسٹوکس کو یہ اعزاز دیا جاتا ہے تو وہ اسے وصول کرنے والے انگلینڈ کے 12ویں اور مجموعی طور پر 23ویں کرکٹر ہوں گے۔

اس سے قبل سابق عظیم انگلش اوپننگ بلے باز ایلسٹر کُک وہ آخری کھلاڑی تھے جنہیں یہ اعزاز دیا گیا تھا۔