پاکستانی ڈراما انڈسٹری کے معروف اداکار عابد علی اس وقت شدید بیمار اور ہسپتال میں زیر علاج ہیں جبکہ کی ان کی بیٹی نامور ماڈل ایمان علی نے مداحوں سے والد کی بہتر صحت کے لیے دعا کی اپیل کردی۔

ایمان علی نے اپنے انسٹاگرام اکاؤنٹ پر والدین کے ساتھ بچپن کی ایک تصویر شیئر کی، جس میں ان کی دونوں بہنیں مریم علی اور رحمہ علی بھی موجود ہیں۔

تصویر شیئر کرنے کے ساتھ ایمان نے بتایا کہ ان کے والد کی طبیعت کافی خراب ہے اور مداحوں سے درخواست کی کہ وہ ان کے لیے دعا کریں۔

ایمان علی کی پوسٹ پر شوبز انڈسٹری سے تعلق رکھنے والی نامور شخصیت نے اداکارہ کو حوصلہ دیا جبکہ ان کے والد کے لیے بھی دعا کی۔

ایمان علی کی بہن رحمہ علی نے بھی اپنے انسٹاگرام اکاؤنٹ پر والد کے ساتھ کچھ تصاویر شیئر کیں۔

انہوں نے بتایا کہ ان کے والد گزشتہ 2 ماہ سے شدید بیمار ہیں، ہر طرح کا علاج کراچکے ہیں، دعائیں بھی کی، لیکن ڈاکٹرز نے جواب دے دیا ہے، انہوں نے کہا ہے کہ وہ والد کو بچانے کے لیے کچھ بھی نہیں کرسکتے۔

رحمہ نے مزید لکھا کہ 'لیکن اللہ سے بڑی تو کوئی طاقت نہیں، وہ چاہے تو کیا نہیں ہوسکتا، ہمارے ساتھ اگر آپ لوگوں کی دعائیں بھی مل جائیں تو شاید ان کی صحت میں بہتری آجائے'۔

خیال رہے کہ 67 سالہ عابد علی اپنے کیریئر میں کئی بڑے ڈراموں میں کام کرچکے ہیں جن میں 'مہندی'، 'دیار دل'، 'بنٹی آئی لو یو'، 'رخصتی' شامل ہیں۔