سام سنگ نے خاموشی سے 'سستا' فائیو جی فون متعارف کرادیا

04 ستمبر 2019

ای میل

— فوٹو بشکریہ سام سنگ
— فوٹو بشکریہ سام سنگ

سام سنگ کی جانب سے رواں سال 2 فائیو جی اسمارٹ فونز گلیکسی ایس 10 فائیو جی اور گلیکسی نوٹ 10 فائیو جی متعارف کرائے جاچکے ہیں، مگر اب خاموشی سے اس نے ایک نیا اور مناسب قیمت والی ڈیوائس بھی پیش کردی ہے۔

جی ہاں سام سنگ نے اپنا سب سے سستا فائیو جی فلیگ شپ فون گلیکسی اے 90 متعارف کرا دیا ہے۔

ویسے تو کمپنی کی جانب سے اس کی قیمت کا اعلان نہیں کیا گیا، مگر یہ فون گلیکسی ایس 10 اور گلیکسی نوٹ 10 جتنا مہنگا نہیں ہوسکتا کیونکہ فیچرز کے لحاظ سے ان سے کمتر ہے۔

اس میں 6.7 انچ کا فل ایچ ڈی پلس انفٹنی یو او ایل ای ڈی ڈسپلے دیا گیا ہے جبکہ باقی دونوں میں خم اسکرین کے ساتھ ہول پنچ سیلفی کیمرے موجود ہیں۔

اے 90 میں فنگرپرنٹ سنسر اسکرین کے اندر دیا گیا ہے جبکہ 2 ڈی چہرہ شناخت کرنے والی ٹیکنالوجی بھی موجود ہے۔

اس کے بیک پر 3 کیمروں کا سیٹ اپ ہے جس میں 48 میگا پکسل مین کیمرا، 8 میگا پکسل الٹرا وائیڈ لینس اور 5 میگا پکسل ڈیپتھ لینس ہے جبکہ فرنٹ پر 32 میگا پکسل کیمرا دیا گیا ہے۔

اس میں اسنیپ ڈراگون 855 پراسیسر دیا گیا ہے جو فائیو جی سپورٹ رکھتا ہے جبکہ 6 سے 8 جی بی ریم اور 128 جی بی اسٹوریج دی جائے گی۔

فوٹو بشکریہ سام سنگ
فوٹو بشکریہ سام سنگ

حیران کن طور پر 6 جی بی ریم والے ورژن میں مائیکرو ایس ڈی کارڈ سپورٹ ہے جبکہ 8 جی بی ریم والے ماڈل میں نہیں۔

جہاں تک بیٹری کی بات ہے تو 4500 ایم اے ایچ بیٹری 25 واٹ فاسٹ چارجنگ سپورٹ کے ساتھ دی گئی ہے مگر وائرلیس چارجنگ نہیں دی گئی۔

اس فون میں ہیڈفون جیک نہیں دیا گیا اور یہ آئندہ چند ہفتوں میں مختلف ممالک میں فروخت کے لیے پیش کیا جائے گا، جب ہی اس کی قیمت سامنے آئے گی۔