'بدھ کو پیار دینے اور ہفتے کو نفرت کرنے کا شکریہ'

اپ ڈیٹ 18 نومبر 2019

ای میل

دونوں ڈراموں میں عائزہ خان نے مرکزی کردار نبھایا — فوٹو: انسٹاگرام
دونوں ڈراموں میں عائزہ خان نے مرکزی کردار نبھایا — فوٹو: انسٹاگرام

پاکستان کی نامور اور خوبصورت اداکارہ عائزہ خان اس وقت ٹیلی اسکرینز پر دو ڈراموں میں مرکزی کردار نبھارہی ہیں۔

ان میں سے ایک ڈراما 'تھوڑا سا حق' ہے جبکہ دوسرا 'میرے پاس تم ہو' ہے، جو ہفتہ وار نشر کیے جارہے ہیں۔

ان دونوں ڈراموں میں عائزہ خان نے مرکزی کردار نبھایا ہے اور دلچسپ بات یہ ہے کہ جہاں ان دونوں ڈراموں کی کہانی ایک دوسرے سے بالکل مختلف ہے وہی عائزہ خان بھی دونوں ڈراموں میں 2 بالکل الگ قسم کے کردار نبھاتی نظر آرہی ہیں۔

مزید پڑھیں: عائزہ وہ کردار ادا کرنے جارہی ہیں جو انہوں نے کبھی نہیں کیا

یہ تو سب جانتے ہی ہیں کہ عائزہ خان کا شمار پاکستان کی بہترین اداکاراؤں میں ہوتا ہے لیکن وہ اپنے ان دونوں ڈراموں کی وجہ سے بھی خاصی پذیرائی حاصل کررہی ہیں۔

اس حوالے سے اداکارہ نے سماجی رابطے کی ویب سائٹ ٹوئٹر پر ایک دلچسپ ٹوئٹ کے ذریعے مداحوں کا شکریہ بھی ادا کیا۔

عائزہ خان نے اپنے دونوں کرداروں کی تصویر شیئر کرنے کے ساتھ کہا کہ 'ایک وقت میں دو بالکل مختلف کردار نبھانا آسان نہیں، البتہ مداحوں کا شکریہ جنہوں نے مجھے بدھ کو تھوڑا سا حق کے لیے پیار دیا اور ہفتے کو میرے پاس تم ہو کے لیے نفرت کی'۔

خیال رہے کہ اے آر وائی ڈجیٹل پر نشر ہونے والے ڈرامے 'تھورا سا حق' کی کہانی ایک خاندان کے گرد گھومتی ہے، جس میں بھائیوں کے درمیان ہوئے تنازع کا اثر ان کے بچوں کی زندگی پر بھی پڑ رہا ہے، اس ڈرامے میں عائزہ خان نے ایک غریب لڑکی کا کردار نبھایا ہے جو اپنے والد کے انتقال کے بعد اپنے دونوں تایا کے گھر جاکر رہنا شروع کردیتی ہے۔

عائزہ خان کے چھوٹے تایا اپنے بھائی کی آخری خواہش پوری کرتے ہوئے ان کی شادی اپنے بیٹے سے کروا دیتے ہیں، تاہم اس شادی کے بارے میں اب تک ان کے گھر میں کسی کو کچھ معلوم نہیں ہے۔

تھوڑا سا حق میں عائزہ کے ہمراہ عمران عباس کام کررہے ہیں — فوٹو/ فیس بک
تھوڑا سا حق میں عائزہ کے ہمراہ عمران عباس کام کررہے ہیں — فوٹو/ فیس بک

اس ڈرامے میں عائزہ خان کے ہمراہ عمران عباس نے مرکزی کردار نبھایا ہے، تاہم مداح عائزہ خان کے اس معصوم سے کردار کو بےحد پسند کررہے ہیں۔

یہ بھی پڑھیں: سپر ہٹ ڈرامے 'میرے پاس تم ہو' کو 4 ہدایت کاروں نے کیوں ٹھکرایا؟

دوسری جانب 'میرے پاس تم ہو' ڈراما تو پہلی قسط سے ہی سوشل میڈیا پر وائرل ہے۔

اس ڈرامے میں عائزہ خان نے ہمایوں سعید کی اہلیہ کا کردار نبھایا، تاہم وہ ڈرامے میں شاہوار کا کردار نبھانے والے عدنان صدیقی سے تعلقات استوار کرکے اپنے شوہر اور بیٹے کو چھوڑ کر چلی جاتی ہیں۔

اس ڈرامے میں عائزہ خان ایک نہایت لالچی اور خودغرض لڑکی کے کردار میں نظر آئیں، سوشل میڈیا پر جہاں عائزہ کے کردار کو شدید تنقید کا نشانہ بنایا گیا وہیں ان کی اداکاری کو خوب سراہا جارہا ہے۔

میرے پاس تم ہو میں عدنان صدیقی اور ہمایوں سعید نے بھی اہم کردار نبھائے — فوٹو/ فیس بک
میرے پاس تم ہو میں عدنان صدیقی اور ہمایوں سعید نے بھی اہم کردار نبھائے — فوٹو/ فیس بک

یاد رہے کہ 2 نومبر کو جب اس ڈرامے کی 12ویں قسط نشر کی گئی تو اس سے قبل بھی عائزہ خان نے ٹوئٹر پر ایک ٹوئٹ میں مداحوں کو آگاہ کیا تھا کہ 'میرے پاس تم ہو کی آج رات نشر ہونے والی قسط نہ دیکھیے گا، ورنہ آپ سب مجھ سے ہمیشہ کے لیے نفرت کرنے لگیں گے'۔

اس قسط میں عائزہ خان اپنے شوہر اور بیٹے کو چھوڑ کر عدنان صدیقی کے ساتھ چلی جاتی ہیں جبکہ انہیں ڈرامے میں نہایت امیر شخص کا کردار نبھاتے ہوئے دکھایا گیا ہے۔

واضح رہے کہ 'تھوڑا سا حق' کی ہدایات احمد بھٹی دے رہے ہیں جبکہ اس کی کہانی عبدالرزاق نے تحریر کی ہے۔

علاوہ ازیں 'میرے پاس تم ہو' کی کہانی خلیل الرحمٰن قمر نے لکھی ہے جبکہ اس ڈرامے کی ہدایات ندیم بیگ دے رہے ہیں۔