بھارت: نامور اداکارہ شبانہ اعظمی کار حادثے میں شدید زخمی

اپ ڈیٹ 18 جنوری 2020

ای میل

شبانہ اعظمی کی گاڑی کو مہاراشٹرا کے ضلع ریگاد میں ممبئی ۔ پونے ایکسپرس وے پر حادثہ پیش آیا — فائل فوٹو
شبانہ اعظمی کی گاڑی کو مہاراشٹرا کے ضلع ریگاد میں ممبئی ۔ پونے ایکسپرس وے پر حادثہ پیش آیا — فائل فوٹو
حادثہ اتنا خوفناک تھا کہ اداکارہ کی گاڑی کا اگلا حصہ پوری طرح تباہ ہوگیا — فوٹو: بشکریہ اے این آئی
حادثہ اتنا خوفناک تھا کہ اداکارہ کی گاڑی کا اگلا حصہ پوری طرح تباہ ہوگیا — فوٹو: بشکریہ اے این آئی

بھارت کی نامور اداکارہ شبانہ اعظمی ریاست مہاراشٹرا میں کار حادثے میں شدید زخمی ہوگئیں۔

این ڈی ٹی وی کی رپورٹ کے مطابق شبانہ اعظمی کی گاڑی کو مہاراشٹرا کے ضلع ریگاد میں ممبئی ۔ پونے ایکسپرس وے پر حادثہ پیش آیا۔

حادثے کے وقت گاڑی میں اداکارہ کے شوہر و معروف لکھاری جاوید اختر بھی موجود تھے، تاہم وہ زخمی ہونے سے بچ گئے۔

رپورٹ میں کہا گیا کہ 69 سالہ اداکارہ کی ٹاٹا سفاری ایس یو وی گاڑی کو حادثہ ممبئی سے تقریباً 60 کلومیٹر دور کھالاپور کے قریب دوپہر ساڑھے 3 بجے کے لگ بھگ پیش آیا اور ان کی گاڑی ایک ٹرک سے پیچھے سے جا ٹکرائی۔

یہ بھی پڑھیں: جاوید اختر اور شبانہ اعظمی کا دورہ کراچی منسوخ

اداکارہ کی گاڑی ایک ٹرک سے پیچھے سے جا ٹکرائی — فوٹو: بشکریہ اے این آئی
اداکارہ کی گاڑی ایک ٹرک سے پیچھے سے جا ٹکرائی — فوٹو: بشکریہ اے این آئی

حادثے کی تصاویر میں دیکھا جاسکتا ہے کہ شبانہ اعظمی کو گاڑی کی پچھلی نشست سے نکالا گیا اور ان کے چہرے اور آنکھ پر سوجن نظر آئی۔

حادثہ اتنا خوفناک تھا کہ اداکارہ کی گاڑی کا اگلا حصہ پوری طرح تباہ ہوگیا۔

ریگاد کے سپرنٹنڈنٹ پولیس انیل پرَسکار نے کہا کہ شبانہ اعظمی کو فوری طور پر ممبئی کے ایم جی ایم ہسپتال منتقل کیا گیا جہاں ان کا علاج جاری ہے۔

ہائی وے پولیس کی گشتی ٹیمیوں نے جائے حادثہ پر پہنچ کر تحقیقات کا آغاز کردیا ہے۔

مزید پڑھیں: فیض فیسٹول: بھارتی شاعر جاوید اختر، اداکارہ شبانہ اعظمی کی لاہور آمد

واضح رہے کہ شبانہ اعظمی کو 1998 میں پدما شِری ایوارڈ سے نوازا گیا تھا جبکہ وہ 5 بار نیشنل فلم ایوارڈ بھی حاصل کر چکی ہیں۔

وہ آخری بار 2017 میں ریلیز ہونے والی فلم 'دی بلیک پرِنس' میں اداکاری کرتی ہوئی نظر آئی تھیں۔

شبانہ اعظمی اور جاوید اختر کئی بار پاکستان میں ثقافتی و ادبی پروگراموں میں بھی شرکت کر چکے ہیں۔