گزشتہ چند ہفتوں سے بھارتی حکومت کی جانب سے بنائے گئے متنازع شہریت قانون پر خاموشی اختیار کرنے پر تنقید کا نشانہ بننے والے سلمان خان کے حوالے سے تازہ خبر یہ ہے کہ انہوں نے پاکستانی منتظم کے ایک شو میں جانے سے انکار کردیا۔

سلمان خان کو امریکی شہر ہیوسٹن میں ایک شو میں پرفارمنس کرنے کی دعوت دی گئی تھی جس میں ان کے علاوہ دیگر بھارتی و پاکستانی فنکار بھی پرفارمنس کریں گے۔

ابتدائی طور پر سلمان خان نے پاکستانی منتظم ریحان صدیقی کی جانب سے ریاست ٹیکساس کے سب سے بڑے شہر ہیوسٹن میں ترتیب دیے گئے شو میں پرفارمنس کرنے کا وعدہ کیا تھا تاہم اب انہوں نے شو میں جانے سے انکار کردیا۔

ٹائمز آف انڈیا نے اپنی رپورٹ میں بتایا کہ سلمان خان نے ہیوسٹن میں پاکستانی شہری ریحان صدیقی کے شو میں جانے سے انکار کردیا تاہم خود اداکار نے اس حوالے سے کوئی وضاحت نہیں کی۔

رپورٹ میں دیگر بھارتی اداروں کی رپورٹس کا حوالہ دیتے ہوئے بتایا گیا کہ اب سلمان خان رواں ماہ میں ہونے والے پاکستانی منتظم کے شو میں شرکت نہیں کریں گے۔

یہ پہلا موقع نہیں ہے کہ کسی بھارتی فنکار نے پاکستانی منتظم کے شو میں جانے سے انکار کیا ہو، ان سے قبل بھارتی گلوکار کمار سانو، ایلکا یاگنک، اڈت نارائن، دلجیت دسانج اور دیگر فنکار اور گلوکار بھی امریکا میں پاکستانی منتظم کے شو میں جانے سے انکار کردیا تھا۔

امریکا میں موجود پاکستانی منتظمین پاکستانی و بھارتی فنکاروں کے مشترکہ شو اور کنسرٹ کرواتے رہتے ہیں جن میں دونوں ممالک کے فنکار مشترکہ طور پر پرفارمنس کرتے دکھائی دیتے ہیں۔

تاہم گزشتہ کچھ ماہ سے ہندو انتہاپسندوں اور حکومتی دباؤ کی وجہ سے بھارتی فنکار پاکستانی منتظمین کے شو میں شرکت سے انکار کرتے دکھائی دیتے ہیں۔

یہ بھی پڑھیں: تنقید کے بعد بھارتی گلوکار کا پاکستانی شہری کےشو میں آنے سے انکار

دلچسپ بات یہ ہے کہ سلمان خان سمیت کئی بڑے بولی وڈ ستارے ماضی میں اسی منتظم ریحان صدیقی کے شوز میں پرفارم کر چکے ہیں۔

ریحان صدیقی کو جنوبی ایشیا اور پاک و ہند کے مشترکہ شوز اور ایونٹ منعقد کرنے والے سب سے بڑے منتظم کا درجہ بھی حاصل ہے جو اب تک بھارت اور پاکستان کے لیجنڈ فنکاروں سمیت ابھرتے فنکاروں کے ساتھ 400 تک شوز اور ایونٹ منعقد کر چکے ہیں۔