پاکستان ٹیلی وژن (پی ٹی وی) نے معروف ترک ڈرامے 'دیریلیش ارطغرل' جسے اردو میں ترجمہ کرکے 'ارطغرل غازی' کے نام سے چلایا جا رہا ہے، اس کے شائقین کو عید پر تحفہ دینے کا اعلان کردیا۔

'ارطغرل غازی' کو پی ٹی وی پر گزشتہ ماہ 24 اپریل سے نشر کیا جا رہا ہے اور 24 مئی تک اس ڈرامے کی 30 اقساط نشر کی چکی تھیں۔

اس ڈرامے نے نشر ہوتے ہی پاکستان میں مقبولیت کے نئے ریکارڈز بنائے تھے اور اسے یوٹیوب پر محض 20 دن میں 21 کروڑ بار دیکھا جا چکا تھا جب کہ اب تک اسے 30 کروڑ بار تک دیکھا جا چکا ہے۔

ڈرامے کی مقبولیت کو دیکھتے ہوئے معروف ڈراما ساز خلیل الرحمٰن قمر نے بھی اسی طرز کا پاکستانی ڈراما بنانے کا اعلان کیا تھا اور ہمایوں سعید نے بھی تصدیق کی تھی کہ وہ خلیل الرحمٰن قمر کے ساتھ مل کر ڈرامے پر کام کریں گے۔

یہ بھی پڑھیں: ’میرے پاس تم ہو‘ نے جو ریکارڈ 9 ماہ میں بنایا، ’ارطغرل‘ نے 3 ہفتوں میں توڑ دیا

یہی نہیں بلکہ ڈرامے کی مقبولیت کو دیکھتے ہوئے ٹک ٹاک اسٹار حریم شاہ نے 'ارطغرل غازی' کے مرکزی کردار حلیمہ سلطان جیسا کردار بھی ادا کرنے کی خواہش کا اٖظہار کیا تھا جب کہ ترک ڈرامے کو پی ٹی وی پر نشر کیے جانے کے معاملے پر بھی پاکستانی شوبز شخصیات دو رائے میں تقسیم ہوگئی تھیں۔

جہاں شان، ریما اور یاسر حسین جیسے اداکاروں نے 'ارطغرل غازی' کو پی ٹی وی پر نشر کرنے پر اعتراض کیا، وہیں خالد عثمان بٹ، احمد علی بٹ اور علی کاضمی سمیت دیگر اداکاروں نے اسے پی ٹی وی پر نشر کرنے کی حمایت کی تھی۔

ڈرامے کی مقبولیت اور پاکستان میں مداحوں کے جذبے کو دیکھتے ہوئے 'ارطغرل غازی' کے تقریبا تمام ہی مرکزی اداکار پاکستان آنے کی خواہش کا اظہار بھی کر چکے ہیں۔

اور اب پی ٹی وی نے 'ارطغرل غازی' کے شائقین کی خواہش کو مدنظر رکھتے ہوئے ڈراما شائقین کو عید پر تحفہ دینے کا اعلان کردیا۔

پی ٹی وی ہوم کی انتظامیہ نے اعلان کیا ہے کہ شائقین کی خواہش کو مدنظر رکھتے ہوئے عید الفطر کے تینوں دن 'ارطغرل غازی' کو ہر روز شام 6 بجے سے لے کر رات 10 بجے تک نشر کیا جائے گا۔

پی ٹی وی کی جانب سے ٹوئٹ کے ذریعے کیے گئے اعلان کے مطابق عید کے تینوں دن ڈرامے کو بیک وقت 4 گھنٹے تک نشر کیا جائے گا اور اس دوران ڈرامے کی نشر کی گئی قسطوں کے خلاصے کو پیش کیا جائے گا۔

مزید پڑھیں: ’دیریلیش ارطغرل‘ 20 دن میں 20 کروڑ بار دیکھا جانے والا ڈراما

یعنی عید کے تینوں دن ڈرامے کی اب تک نشر ہونے والی 30 اقساط کی سمری کو پیش کیا جائے گا اور یہ تحفہ خصوصی طور پر ان شائقین کے لیے بہتر ہے، جنہوں نے درمیان میں کسی مصروفیت کی وجہ سے 'ارطغرل غازی' کی قسط نہیں دیکھی ہوگی۔

پی ٹی وی کے مطابق 'ارطغرل غازی' کی 30 قسطوں کی سمری کو 24 سے لے کر 26 مئی تک شام 6 بجے سے لے کر رات 10 بجے تک نشر کیا جائے گا۔

یہ بھی پڑھیں: 'ارطغرل غازی' کو نشر کرنے سے میرے 35 روپے وصول ہوگئے'

خیال رہے کہ دیریلیش ارطغرل‘ ڈرامے کی کہانی 13ویں صدی میں ’سلطنت عثمانیہ‘ کے قیام سے قبل کی ہے اور اس ڈرامے کی مرکزی کہانی ’ارطغرل‘ نامی بہادر مسلمان سپہ سالار کے گرد گھومتی ہے جنہیں ’ارطغرل غازی‘ بھی کہا جاتا ہے۔

ڈرامے میں دکھایا گیا ہے کہ کس طرح 13ویں صدی میں ترک سپہ سالار ارطغرل نے منگولوں، صلیبیوں اور ظالموں کا بہادری سے مقابلہ کیا اور کس طرح اپنی فتوحات کا سلسلہ برقرار رکھا۔

ڈرامے میں سلطنت عثمانیہ سے قبل کی ارطغرل کی حکمرانی، بہادری اور محبت کو دکھایا گیا ہے، اس ڈرامے کی مجموعی طور 179 قسطیں ہیں اور پی ٹی وی پر 24 مئی تک 30 قسطیں ہی نشر کی جا سکی تھیں۔