لانگ جمپ کی ویڈیو وائرل، ایتھلیٹکس فیڈریشن کا نوجوان سے رابطہ

اپ ڈیٹ 04 اگست 2020

ای میل

نوجوان کی لانگ جمپ کی سوشل میڈیا پر وائرل ہوگئی تھی—فوٹو:اسکرین شاٹ
نوجوان کی لانگ جمپ کی سوشل میڈیا پر وائرل ہوگئی تھی—فوٹو:اسکرین شاٹ

پاکستان ایتھلیٹکس فیڈریشن نے سوشل میڈیا پر لانگ جمپ کی ویڈیو وائرل ہونے پر نوجوان آصف کو ڈھونڈ نکالا اور لاہور طلب کرلیا ہے۔

پاکستان ایتھلیٹکس فیڈریشن کے صدر میجرجنرل (ر) اکرم ساہی کے احکامات پر کوچ رفیق احمد نے نوجوان کو تلاش کرلیا جبکہ نوجوان آصف کولاہور بلا لیا۔

سوشل میڈیا پر وائرل ویڈیو میں لانگ جمپ لگانے والے نوجوان آصف کا تعلق سندھ کے ضلع ٹھٹہ سے ہے اور وہ کراچی میں مقیم ہیں۔

ٹھٹہ سے تعلق رکھنے والے 22 سالہ آصف میٹرک پاس ہیں۔

خیال رہے کہ آصف کی 10 سے 12 موٹر سائیکلوں کے اوپر سے لانگ جمپ لگانے کی ویڈیو سوشل میڈیا پر وائرل ہوئی تھی اور صارفین نے حکومت کی توجہ اس طرف دلانے کی کوشش کی تھی۔

صدرپاکستان ایتھلیٹکس فیڈریشن اکرم اسہی کا کہنا تھا کہ نوجوان آصف سے رابطہ ہوا ہے اور انہیں لاہور بلالیا ہے۔

انہوں نے کہا کہ کوچز آصف کے ٹرائلز لیں گے جبکہ ایتھلیٹکس فیڈریشن آصف کو تمام سہولیات فراہم کرے گی۔

ان کا کہنا تھا کہ ویڈیو سے لگتا ہے کہ نوجوان میں آگے بڑھنے کی صلاحیت موجود ہے اور فیڈریشن لاہور آنے جانے کے لیے ان کی مالی معاونت بھی کرے گی۔

اکرم ساہی نے کہا کہ نوجوان آصف کی ویڈیوز دیکھنے کے بعد میں خود اس کا مداح بن گیا ہوں۔

سوشل میڈیا صارفین نے پاکستان میں ٹیلنٹ کی ناقدری پر افسوس کا اظہار کیا اور نوجوان کو ان کی صلاحیتوں پر داد دی۔

ان کا کہنا تھا کہ اگر اس نوجوان کی مناسب دیکھ بھال کرکے تربیت دی گئی تو اولمپک میں پاکستان کے لیے میڈل جیتیں گے۔