صحت غذ١ کاروبار موبائل فون‎حیرت انگیز غزہ المیہ ایران اسرائیل کشیدگی

اگرچہ پاکستان کی 70 سال سے زائد سینما انڈسٹری کی تاریخ میں حب الوطنی، آزادی اور پاک فوج کی جدوجہد پر درجنوں فلمیں بنائی گئیں، تاہم گزشتہ چند سال میں ایسی فلمیں بنائے جانے میں اضافہ دیکھنے میں آیا ہے۔

گزشتہ 5 سال میں جہاں پاکستان کی سینما انڈسٹری نے تھرلر، ایکشن، رومانس اور بہترین کامیڈی فلمیں دی ہیں، وہیں اس انڈسٹری نے وطن سے محبت کا جذبہ بیدار کرنے والی بہترین فلمیں بھی بنائی ہیں۔

درج ذیل وہ چند فلمیں ہیں، جنہیں آج کے نوجوانوں کو دیکھنا چاہیے۔

آپریشن 021

پروڈیوسر زیبا بختیار کی اس فلم کی ہدایات جامی نے دیں، جب کہ شان، ایوب کھوسو، آمنہ شیخ، شمعون عباسی اور مصطفیٰ چنگیزی جیسے اداکاروں نے اس میں جوہر دکھائے۔

ایک تھی مریم

ہدایت کار سرمد کھوسٹ کی 2016 میں ریلیز ہونے والی فلم 'ایک تھی مریم' میں مرکزی کردار صنم بلوچ نے ادا کیا، مذکورہ ٹیلی فلم کو مہرین جبار نے پروڈیوس کیا ہے جب کہ اس کی کہانی عمیرہ احمد نے لکھی تھی۔

'ایک تھی مریم' کی کہانی پاکستان کی فائٹر پائلٹ مریم مختار کی زندگی کے گرد گھومتی ہے جو اپنی ڈیوٹی نبھاتے ہوئے شہید ہوگئی تھیں۔

آزادی

پروڈیوسر عرفان اور عمران ملک کی اس فلم کی کہانی اگرچہ براہ راست پاکستان سے محبت پر مبنی نہیں تاہم اس فلم میں مقبوضہ کشمیر کی آزادی کی کہانی کو انتہائی حب الوطنی سے پیش کیا گیا ہے۔

فلم کی ہدایات بھی خود عمران ملک نے دی ہیں، جب کہ اس میں معمر رانا، سونیا حسن، جاوید شیخ اور ندیم بیگ نے اداکاری کے جوہر دکھائے۔

یلغار

پروڈیوسر، ہدایت کار و لکھاری حسن رضا کی اس فلم میں شان، ہمایوں سعید، عدنان صدیقی، بلال اشرف، ارمینہ خان، عائشہ عمر، گوہر خان اور ایوب کھوسہ سمیت دیگر اداکار ایکشن میں نظر آئے۔

مالک

اس فلم کو عاشر عظیم نے پروڈیوس کیا، جب کہ انہوں نے ہی اس کی ہدایات دیں، جب کہ وہ خود بھی فلم میں ایکشن میں نظر آئے، ان کے ساتھ فلم کی دیگر کاسٹ میں فرحان علی آغا، سجاد حسن اور احتشام الدین سمیت دیگر اداکار شامل تھے۔

جناح

اس فلم کو جمیل دہلوی نے نہ صرف پروڈیوس کیا بلکہ انہوں نے اس کی ہدایات بھی دیں، فلم میں انگریز اداکار کرسٹو فر لی، ششی کپور، جیمز فاکس، ماریہ ایٹکن اور رچرڈ لنٹم سمیت دیگر اداکار ایکشن میں نظر آئے۔

وار

پروڈیوسر حسن رانا کی اس فلم کی ہدایات بلال اشرف نے دیں، اس میں ایک بار پھر شان کے ساتھ شمعون عباسی، میشا شفی، عائشہ خان، حمزہ علی عباسی اور علی عظمت سمیت دیگر اداکار اسکرین پر نظر آئے۔

سلیوٹ

فلم ساز شہزاد رفیق کی اس فلم میں علی محتشم، صائمہ نور، عجب گل، نیر اعجاز اور پرویز کلیم سمیت دیگر اداکار ایکشن میں نظر آئے۔

بدل

فلم ساز و اداکار جمال کی اس فلم میں عمران عباس اور سعدیہ خان سمیت دیگر اداکار ایکشن میں نظر آئے۔

پرواز ہے جنون

پروڈیوسر مومنہ درید اور عثمان گیلانی کی اس فلم کی ہدایات حسیب حسن نے دیں، جب کہ اس میں احد رضا میر، حمزہ علی عباسی، شاز خان، کبریٰ خان اور ہانیہ عامر سمیت دیگر اداکار ایکشن میں نظر آئے۔