امریکا کے صدر ڈونلڈ ٹرمپ، ملک کے نومنتخب صدر جو بائیڈن کی حلف برداری کی تقریب میں شریک ہوئے بغیر وائٹ ہاؤس سے میری لینڈ میں واقع اینڈریو ایئربیس روانہ ہوگئے جہاں انہوں نے اپنی اہلیہ کے ہمراہ حامیوں سے بطور امریکی صدر الوادعی خطاب کیا۔

ڈونلڈ ٹرمپ نے وائٹ ہاؤس سے رخصت ہوتے وقت صحافیوں کو کہا کہ ہمارے حیرت انگیز 4 سال گزرے ہیں اور ہم نے بہت سے معاملات کو انجام تک پہنچایا ہے۔

انہوں نے مزید کہا کہ ہم امریکی عوام سے محبت کرتے ہیں۔

بعد ازاں امریکی صدر نے میری لینڈ میں واقع ایئربیس پر اپنے حامیوں سے خطاب کے دوران کہا کہ لوگوں کو اندازہ نہیں کہ ان کے اہلخانہ اور انہوں نے 4 سال کس طرح جدوجہد کی ہے۔

ڈونلڈ ٹرمپ نے امریکی فوج میں کی جانے والی تبدیلیوں کی نشاندہی کرتے ہوئے کہا کہ ’ہم نے جو کچھ کیا وہ ہر معیار سے حیرت انگیز تھا‘۔

انہوں نے کہا کہ مجھے امید ہے کہ وہ آپ کے ٹیکس میں اضافہ نہیں کریں گے لیکن اگر وہ کرتے ہیں تو میں نے آپ کو پہلے ہی آگاہ کیا تھا۔

ڈونلڈ ٹرمپ نے کورونا وائرس وبا سے متعلق کہا کہ ’ہم نے جو کچھ کیا وہ طبی معجزہ ہے اور وہ ویکسین ہے‘۔

انہوں نے کہا کہ وائرس ایک ’خوفناک چیز‘ ہے۔

ڈونلڈ ٹرمپ نے ایک مرتبہ پھر کورونا کو ’چائنا وائرس‘ قرار دیا۔

انہوں نے اپنی الوادعی تقریر کے اختتام پر کہا کہ صدر بننا ’سب سے بڑا اعزاز‘ رہا ہے۔

حامیوں کو مخاطب کرتے ہوئے ڈونلڈ ٹرمپ نے کہا کہ 'میں ہمیشہ آپ کے لیے لڑتا رہوں گا‘ اور ’دیکھتے اور سنتے‘ رہیں گے اور ایک مرتبہ پھر واپس آنے کا وعدہ کرتا ہوں۔

ڈونلڈ ٹرمپ نے جو بائیڈن اور کملا ہیرس کا نام لیے بغیر نئی انتظامیہ کے لیے نیک خواہشات کا اظہار کیا۔

علاوہ ازیں وائٹ ہاؤس کی جانب سے ڈونلڈ ٹرمپ کی 'الوداعی ویڈیو' جاری کی گئی۔

ویڈیو میں ڈونلڈ ٹرمپ نے کہا کہ ’رواں ہفتے نئی انتظامیہ آرہی ہے اور امریکا کی سلامتی اور اس کی خوشحالی اور اس کی کامیابی کے لیے دعا گو ہوں‘۔

انہوں نے کہا کہ ’ہم نیک خواہشات کا اظہار کرتے ہیں اور ہم یہ بھی چاہتے ہیں کہ وہ خوش قسمت رہیں‘۔

انہوں نے کہا کہ بطور صدر میری اولین ترجیح امریکی کارکنوں اور امریکی خاندانوں کے مفادات رہی، میں نے آسان ترین راستہ تلاش نہیں کیا ،دراصل یہ سب سے مشکل تھا۔

ان کا کہنا تھا کہ ’میں نے مشکل اور سخت ترین لڑائیاں لڑیں، مشکل ترین انتخاب لڑا کیونکہ آپ نے مجھے ایسا کرنے کے لیے منتخب کیا‘۔