’عینک والا جن‘ کی ’ریٹرن آف نستور‘ کے نام سے ٹی وی اسکرین پر واپسی
بچوں کا مقبول ترین پاکستانی ڈراما ’عینک والا جن‘ اب نئے نام اور انداز ’ریٹرن آف نستور’ کے نام سے ٹی وی اسکرینز پر پیش کیا جارہا ہے۔
خیال رہے کہ ’عینک والا جن‘ 90 کی دہائی میں نشر ہوا تھا، جسے پاکستان ٹیلی ویژن (پی ٹی وی) نے پروڈیوس کیا تھا اور یہ ڈراما بچوں و بڑوں سب میں بے حد مقبول ہوا تھا۔
’عینک والا جن‘ کو 1993 سے 1996 تک پی ٹی وی پر نشر کیا گیا تھا اور عوام کے مطالبے پر اسے پاکستان ٹیلی ویژن پر مزید 2 بار نشر کیا گیا تھا۔
جادوگروں، جن اور پریوں کی کہانی کے گرد گھومتے اس ڈرامے نے بہت مقبولیت حاصل کی تھی اور اس کا ذکر اب بھی بچوں کے بہترین ڈرامے کے طور پر کیا جاتا ہے۔
اب ’عینک والا جن‘ کا سیکوئیل ’ریٹرن آف نستور‘ کے نام اور نئے انداز سے ٹی وی پر نشر کیا جارہا ہے
تاہم یہ ڈراما پی ٹی وی پر نہیں بلکہ پاکستانی چینل سب ٹی وی پر نشر کیا جارہا ہے اور اب تک اس کی صرف ایک قسط نشر ہوئی ہے۔
‘ریٹرن آف نستور‘کی کہانی بھی ’عینک والا جن‘ کی طرح جادوگروں، جن اور پریوں کے گرد گھومتی ہے۔
اس ڈرامے میں شائقین کی دلچسپی برقرار رکھنے کے لیے جدید ٹیکنالوجی کا استعمال بھی دکھایا گیا ہے۔
لائیو ٹی وی